Toshkentda savdo-iqtisodiy hamkorlik bo‘yicha O‘zbekiston-Shveytsariya hukumatlararo komissiyasining sakkizinchi yig‘ilishi bo‘lib o‘tdi. Unda tegishli vazirlik va idoralar, shuningdek, Shveytsariya kompaniyalari va banklarining 25 dan ortiq vakillari ishtirok etdilar.
Investitsiyalar va tashqi savdo vazirligi PR markazi xabariga ko‘ra, hukumatlararo muloqot doirasida tovar ayirboshlash hajmining ijobiy dinamikasi, mamlakatda Shveytsariya biznesining o‘rnini mustahkamlash hamda Yevropa ishbilarmon doiralarining O‘zbekistonda yangi g‘oyalar va tashabbuslarni amalga oshirishga qiziqishi tobora ortib borayotgani qayd etilgan.
Shu munosabat bilan Shveytsariya hukumati O‘zbekistonni JSTga a'zo bo‘lish doirasida qo‘llab-quvvatlashga tayyorligini bildirdi.
Uchrashuv yakunida bank sektorida hamkorlikni kuchaytirish, qo‘shimcha eksport kredit liniyalarini ochish, sayyohlik, sanoat, qishloq xo‘jaligi va ta'lim sohasida yangi qo‘shma loyihalarni amalga oshirishni nazarda tutuvchi ikki tomonlama bitimlar imzolandi.
