Sudanda iyul oyi boshidagi davlat to‘ntarishiga urinish ishini tergov qilish doirasida 11 nafar yuqori lavozimdagi ofitser, jumladan qurolli kuchlar birlashgan shtabi rahbari hibsga olindi. Bu haqda Al Hadath telekanali xabar berdi.
Xabarda aytilishicha, hukumatga qarshi fitnaga aloqadorlikda ayblanib avvalgi prezident Umar al Bashir rejimiga aloqador o‘n bir nafar ofitser qo‘lga olingan. Ular orasida qurolli kuchlar birlashgan shtabi rahbari general Hoshim Abdul Muttalib, tank qo‘shinlari qo‘mondonni general-mayor Nasriddin Abdulfattoh va markaziy harbiy okrug qo‘mondoni general-mayor Baxr bor.
Telekanal manbalariga ko‘ra, harbiy kengash ularning aybdorligi borasida "ishonchli dalillar"ga ega.
11 iyulda Sudan hukumati davlat to‘ntarishiga urinishning oldi oilngani haqida xabar qilgandi. Ma'lumot berilishicha, armiya va maxsus xizmatlarning yuqori lavozimdagi ofitserlari hukumatni egallab olishga uringan. O‘shanda yuqori darajadagi 12 nafar ofitser hibsga olingandi.
