Qirg‘izistonlik kurashchilar Tbilisida o‘tgan yunon-rum kurashi bo‘yicha xalqaro turnir finalida bir-biriga qarshi kurashishdan bosh tortdi.
Ushbu holat videosi YouTube’da e'lon qilingan.
66 kggacha vazn toifasi final bahsi 9 avgustda o‘tishi kerak edi. Matga qirg‘izistonlik ikki kurashchi - Kanibek Jolchubekov va Jolaman Sharshenbekov chiqishgan. Videoda Sharshenbekov g‘alabani Jolchubekovga berishni iltimos qilganini ko‘rish mumin. Natijada uning iltimosi bajarilgan.
Bu sportchilar avvalroq boshqa bir turnirda o‘zaro bellashishlariga to‘g‘ri kelgan va o‘shanda 20 yoshli Sharshenbekov 30 yoshli Jolchubekovga mag‘lub bo‘lgan.
Kanibek Jolchubekov talabalar orasida jahon, Osiyo chempioni, ikkita Osiyo o‘yinlari kumush sovrindori, bir qator xalqaro musobaqalar g‘olibi hisoblanadi.
Jolaman Sharshenbekov esa jahon chempionatida kumush medal qo‘lga kirita olgan Qirg‘iziston tarixidagi ikkinchi kurashchi bo‘lib, Osiyo chempionatlari sovrindoridir.
