Hukumat tomonidan parlamentga kiritilgan ko‘rsatilgan qonun loyihasi birinchi o‘qishda shu yil 6 sentyabrda qabul qilindi. Qonunning yangi tahrirda qabul qilinishi mamlakat iqtisodiyoti va ijtimoiy hayoti uchun eng muhim faoliyatdagi munosabatlarni har tomonlama hamda tizimli ravishda tartibga solishga imkon beradi.
Qonun nashriyotlar, ishlab chiqaruvchilar, noshirlik mahsulotlarining mualliflari va tarqatuvchilarini tartibga solishni qamrab oladi. Qonunning muhim yangiliklaridan biri shundaki, u nafaqat noshirlik mahsulotlarining bosma nusxalarini, balki bizning hayotimizga tobora ko‘proq kirib kelayotgan elektron nashrlarni ham ishlab chiqarishni tartibga soladi.
Deputatlar kiritilgan hujjat loyihasini tanqidiy o‘rganib chiqdilar va bir qator muhim takliflarni kiritdilar, ularning qabul qilinishi qonunni qo‘llash samaradorligini sezilarli darajada oshiradi. Xususan, noshirlik sohasidagi xo‘jalik sub'yektlari faoliyatini liberallashtirish, davlat tomonidan qo‘llab-quvvatlash choralarini kengaytirish, ichki bozor ishtirokchilarining mualliflik huquqlarini himoya qilish bo‘yicha takliflar bildirildi.
Qonun loyihasi jamoatchilik muhokamasi uchun Oliy Majlis Qonunchilik palatasining rasmiy veb-saytiga joylashtirildi. Parlament qo‘mitasi ekspertlar va keng jamoatchilikning barcha izohlarini to‘plash hamda hisobga olishdan manfaatdor.
