18:42 / 02.10.2019
8
36901
Senator: «Mehmonxonalar to‘lib ketgan, Senat a'zolarini qayerga joylashtirishni bilmayapmiz»
Foto: KUN.UZ

Toshkentdagi mehmonxonalarda bo‘sh joy topilmasligi tufayli Senatning yalpi majlislari oldidan senatorlarda yashash joyi masalasida muammo tug‘ilmoqda. Bu haqda parlament yuqori palatasining qo‘mita raisi Alisher Kurmanov ma'lum qildi.

«Bizdagi holat absurd: 10 kundan keyin Senat yig‘ilishi bo‘ladi, biz esa senatorlarni qayerga joylashtirishni bilmaymiz. Mehmonxonalarda joy yo‘q», – dedi u.

Kurmanov bu haqda chorshanba kuni, Oliy Majlis Senati va Rossiya Federatsiyalar Kengashi o‘rtasidagi hamkorlik bo‘yicha parlamentlararo komissiyaning Toshkentda o‘tgan yig‘ilishida aytib o‘tdi.

U o‘z so‘zida bu yil O‘zbekistonga turistlar oqimi sezilarli darajada o‘sganini eslab o‘tdi.

«O‘sish bundan ham kattaroq bo‘lishi mumkin edi, ammo muammo shundaki, bizda mehmonxonalar, samolyotlar, poyezdlar va chegaralar sayyohlarning ulkan oqimiga bardosh bera olmaydi», deb izoh berdi Alisher Kurmanov.

Turizmni rivojlantirish davlat qo‘mitasi ma'lumotiga ko‘ra, 2019 yilning 8 oyi davomida O‘zbekistonga 4,3 mln xorijlik sayyoh kelgan. Bu – o‘tgan yilning mos davriga (3,4 mln) nisbatan 26,7 foizga ko‘proq demakdir. Natijada turistik xizmatlar eksporti 854,5 mln dollarni tashkil qilgan (o‘sish – 28 foiz).

Turizm qo‘mitasi yil oxiriga qadar O‘zbekistonga keluvchi sayyohlar soni 6,5 million kishiga yetishini prognoz qilgan. Bu – 2018 yilga nisbatan 15 foizga yuqori ko‘rsatkichdir.

Ushbu xabarga fikringizni bildiring. Buning uchun avtorizatsiyadan oʻtishingiz kerak!
Top