23:56 / 21.10.2019
0
26257
Krasnoyarskdagi damba yorilishi vaqtida O‘zbekiston fuqarosi bedarak yo‘qoldi 
Foto: Rossiya FVV

Rossiyaning Krasnoyarsk o‘lkasida oltin konidagi dambaning yorilishi vaqtida O‘zbekiston fuqarosi, 1987 yilda tug‘ilgan Dishpod Abdujaparovich Azimov bedarak yo‘qoldi. 

19 oktyabrda o‘lkadagi Seyba daryosida “Sibzoloto” kompaniyasi tarkibiga kiruvchi “Sisim” oltin qazib oluvchi artelining texnologik suv havzasidagi damba yorilgandi. 4-5 metrlik to‘lqin pastroqdagi tindirgichlarni buzib yuborgan. Loy va toshdan iborat sel oqimi ishchilar yashagan ikkita yotoqxona va xo‘jalik inshootlarini yuvib ketgan.

O‘zbekistonlik artelda LW-500 yukortgichi haydovchisi bo‘lib ishlagan. Shuningdek, yana 4 kishining taqdiri noma'lumligicha qolmoqda. 

O‘zbekistonning Moskvadagi elchixonasi ushbu masalani nazoratga olgani va Rossiyaning mutasaddi idoralari bilan ish olib borayotganini ma'lum qilgan.

Krasnoyarskdagi fojia 15 kishining hayotini olib ketdi, artelning 44 xodimi jarohat olgan, ulardan 9 nafari shifoxonada qolmoqda.

Ushbu xabarga fikringizni bildiring. Buning uchun avtorizatsiyadan oʻtishingiz kerak!
Top