25 oktabr kuni soat taxminan 11:30da Toshkent viloyatining Zangiota tumanidagi «Toshkent savdo majmuasi» (sobiq «Abu Saxiy» bozori) hududida ishlayotgan besh nafar yuk tashuvchi o‘rtasida janjal kelib chiqishi oqibatida ulardan biri halok bo‘ldi.
«Aniqlanishicha, 2019 yilning 25 oktabr kuni taxminan soat 11:30da Toshkent viloyatining Zangiota tumanidagi «Toshkent savdo majmuasi»ga kirish qismidagi birinchi qator boshida mazkur majmuada arava tortish bilan shug‘ullanuvchi G‘olib Nazarov, Gafur Nazarov, Akram Qosimov, Sodiq Ashirov va Ismoil Normatov o‘rtasida kelib chiqqan o‘zaro janjal vaqtida G‘olib Nazarov sotuv rastasida bo‘lgan polyuvgichlardan birining metall dastasi bilan Ismoil Normatovni bir necha marta urib, tan jarohati yetkazgan. Ismoil Normatov ko‘rsatilgan tibbiy muolajalarga qaramay Respublika shoshilinch tibbiy yordam ilmiy markazi jonlantirish bo‘limida vafot etgan», deyiladi O‘zbekiston Ichki ishlar vazirligi matbuot xizmati ma'lumotida.
Toshkent viloyati IIBB huzuridagi Tergov boshqarmasi tomonidan G‘olib Nazarovga nisbatan Jinoyat kodeksining 104-moddasi, 3-qismi «d» bandi (jabrlanuvchining o‘limiga sabab bo‘lgan qasddan badanga og‘ir shikast yetkazish holati) bo‘yicha jinoyat ishi qo‘zg‘atildi.
26 oktabr kuni unga nisbatan ayblov e'lon qilinib, qamoqqa olish ehtiyot chorasi tanlangan.
Hozirda jinoyat ishi bo‘yicha tergov harakatlari davom ettirilmoqda.
