Qirg‘iziston tashqi ishlar vaziri Chingiz Aydarbekov Tojikistondagi chegara postiga jangarilar tomonidan hujum qilingani yuzasidan xavotir bildirdi. U bu haqda tojikistonlik hamkasbi Sirojiddin Muhriddin bilan telefon orqali suhbatda aytib o‘tdi.
Aydarbekov suhbat davomida Qirg‘iziston bunday xatti-harakatlarni qoralashini va mintaqa davlatlarining mintaqaviy xavfsizlikni ta'minlashda birgalikdagi sa'y-harakatlarini qo‘llab-quvvatlashini aytgan.
Shuningdek, vazir hujum oqibatida halok bo‘lgan tojik harbiylari oilalariga hamdardlik bildirgan.
6 noyabrga o‘tar kechasi soat 03:23da 20 kishidan iborat qurollagan guruh Tojikiston-O‘zbekiston chegarasida joylashgan “Ishkobod” chegara zastavasiga hujum qildi. Tojikiston qurolli tuzilmalari o‘tkazgan amaliyot natijasida 15 jangari yo‘q qilingan, 5 nafari qo‘lga olingan. Amaliyot vaqtida Tojikiston chegara qo‘shinlari harbiysi va ichki ishlar vazirligining xodimi halok bo‘lgan.
Ma'lum qilinishicha, hujumni sodir etgan jinoyatchilar IShID jangarilari bo‘lgan.
