17 dekabrda Xitoyda ishlab chiqarilgan ilk aviatashuvchi kema Xitoy armiyasining harbiy-dengiz kuchlariga topshirildi. Bu haqda Xitoy mudofaa vazirligiga tayanib TASS xabar qildi.
“Shandun” deb nomlangan kemaning topshirilishi tantanali marosimi Sanya shahridagi harbiy-dengiz bazasida Xitoy raisi Si Tszinpin, harbiy-dengiz kuchlarining 5 mingga yaqin vakili va kemani qurishda qatnashgan kishilar ishtirokida bo‘lib o‘tdi.
Xitoy raisi kemani ko‘zdan kechirib, undagi qurilmalar, harbiylarning yashash sharoitlari bilan tanishib chiqqan. U, shuningdek, kema qurilishida ishtirok etganlar bilan uchrashib, ularning ishlarini yuqori baholagan va yangi muvaffaqiyatlarga erishish uchun shunday ishlashda davom etishga chaqirgan.
Xitoy qurollanishida hozirda “Lyaonin”aviatashuvchi kemasi mavjud bo‘lib, u Ukrainadan sotib olingan “Varyag” kemasi negizida qurilgan. Joriy yilda u qayta jihozlanib, modernizatsiya qilingan. “Shandun” ham shu loyiha bo‘yicha, biroq boshidan oxirigacha mahalliy sanoat kuchlari tomonidan qurilgan.
Kema uzunligi 315 metrni, eni 75 metrni, suv sig‘imdorligi 70 ming tonnani tashkil qiladi. Kema soatiga 57 km tezlik bilan harakatlana oladi. Uning tarkibiga 40 ta jangovar parvoz qurilmasi – 36 ta J-15 qiruvchi samolyoti, 2 ta Z-18 transport va 2 ta ko‘p maqsadli Z-9 vertolyotlari kiradi.
Xitoy mudofaa vazirligi umumiy hisobda o‘z floti tarkibiga 4 ta aviatashuvchi kemani kiritmoqchi.
