UzAuto Motors kompaniyasi imkoniyati cheklangan, oyoqlarida nuqsoni bo‘lgan haydovchilarga moslashtirish uchun, qo‘l bilan boshqariladigan maxsus qurilma bilan qayta jihozlashni boshladi.
Qo‘lda boshqarish qurilmasi xaridorning buyurtmasiga asosan Cobalt, Gentra hamda Spark rusumli avtomobillarga rasmiy dilerlik markazlarida o‘rnatiladi. Qurilma O‘zbekiston davlat standartlashtirish Agentligining barcha talablariga javob beradi.
Tayanch-harakat a'zosi funksiyasi buzilgan haydovchilar uchun mo‘ljallangan maxsus moslama faqat to‘liq qurilmaning zaruriy elementlari bilan jihozlangan.
Uskunani o‘rnatish bo‘yicha savollar bilan vakolatli dilerlarga murojaat qilishi mumkin ekani aytiladi.
Bildirilishicha, bugungi kunda dunyoda bir milliardga yaqin imkoniyati cheklangan insonlar bor, shu jumladan O‘zbekiston Respublikasida ular qariyb 600 ming nafarni tashkil qiladi. Ko‘pgina nogironlar kundalik hayotda turli xil muammolarga duch kelishmoqda, bu ularning jamiyatning siyosiy, ijtimoiy, iqtisodiy va madaniy hayotidagi faol ishtirokiga salbiy ta'sir qiladi.
