08:51 / 21.01.2020
0
8193
Alisher Sultonov Viktor Vekselberg bilan muzokaralar o‘tkazdi
Foto: Energetika vazirligi matbuot xizmati

O‘zbekiston energetika vaziri Alisher Sultonov «ReNOVA» kompaniyalari guruhi direktorlar kengashining raisi, «Skolkovo» Fondi direktorlar kengashi raisi Viktor Vekselberg boshchiligidagi Rossiya delegatsiyasini qabul qildi.

Vazirlik matbuot xizmatiga ko‘ra, delegatsiya tarkibidan «Xevel», «KompleksProm» AJ, «ROTeK» AJ, «Gruppa Orgsintez» AJ, «Ximprom» OTAJ, «Tsifra» MChJ kompaniyalari guruhi rahbariyati ham joy olgan.

Muzokaralar davomida «Raqamli konlar» platformasi negizida uglevodorodlarni o‘zlashtirish samaradorligini oshirish bo‘yicha milliy markaz yaratish, O‘zbekistonda qayta tiklanuvchi va muqobil energiya sohasida hamda zarur texnologiyalarni yetkazib berish kabi yo‘nalishlarda hamkorlik qilish istiqbollari muhokama qilindi.

«ReNOVA» kompaniyalari guruhi o‘rnatilgan quvvati 14 GVt.ga teng Rossiyadagi yirik xususiy elektr energiyasi ishlab chiqaruvchi bo‘lib, mamlakatning 20 ta hududida faoliyat ko‘rsatadi. Mazkur kompaniya Rossiyada elektr energetikasini qayta qurish va bozorni shakllantirishning barcha bosqichlarini bosib o‘tdi, shu boisdan Rossiya tomoni tajriba almashish, shuningdek, O‘zbekistondagi loyihalarda ishtirok etish, quyosh elektr stansiyalari qurish bo‘yicha o‘tkazilayotgan tenderlarda qatnashish, qolaversa, O‘zbekistonda quyosh batareyalarini birgalikda ishlab chiqarishni tashkil etish, keyinchalik respublikada amalga oshirilayotgan loyihalarda ulardan foydalanish imkoniyatlarini ko‘rib chiqishni taklif etdi.

Energetika vazirligi mamlakatning energetika sohasida amalga oshirilayotgan islohotlar va xalqaro maslahatchilar bilan hamkorlikda tayyorlangan sohani rivojlantirish konsepsiyasi to‘g‘risida ma'lumot berdi va tabiiy gazni chuqur qayta ishlashga va yuqori qo‘shimcha qiymatga ega mahsulotlar bilan ishlab chiqarishni diversifikatsiyalashga, xususan, to‘qimachilik sanoati uchun polimer va sintetik tolalar ishlab chiqarishni tashkil etishga qiziqish bildirdi. 

Rossiya tomoni o‘z texnologiyalari va ishlab chiqarish jarayonlari bilan bevosita joyida tanishish uchun O‘zbekistonlik mutaxassislarni Rossiya Federatsiyasiga taklif etib, shu munosabat bilan qo‘shma ishchi guruhi tuzish va yuqorida ta'kidlangan sohalarda Rossiya kompaniyalarining tajribasi bilan tanishish va ularni o‘rganish uchun tegishli obektlarga tashrif buyurish tashabbusini ilgari surdi.

Ushbu xabarga fikringizni bildiring. Buning uchun avtorizatsiyadan oʻtishingiz kerak!
Top