23:08 / 28.01.2020
1
21775
5-qavatdan tushib ketgan bolani qutqarib qolgan 3 erkak taqdirlandi

Ijtimoiy tarmoqlarda 14 yanvar kuni Toshkentdagi ko‘p qavatli uylarning birida 5-qavatda yosh bola osilib qolgani va pastga tushib ketgani aks etgan video tarqalgandi.

Olmazor tumani Beruniy mavzesidagi uyida qarovsiz qoldirilgan 3 yoshli bola voqea guvohlari tomonidan qutqarib qolingandi.

Bola xonadon derazasi tashqarisidagi panjaraga osilib turganda qo‘shnilar pastda adyol tortib, uni ushlab qolishga muvaffaq bo‘lishgan. Bola jiddiy jarohatlar olmagan va shifoxonaga yetkazilib, tekshiruvdan o‘tkazilgandi. 

28 yanvarda Toshkent hokimligi matbuot xizmati bolani qutqarib qolgan 3 erkak “Beruniy-3” mahallasida yashovchi Rihsiboy Sultonov, Mansur Ibrohimov va Ma'mur Ibrohimov ekanini ma'lum qildi.

Jonkuyar insonlarga “fuqarolik burchini teran anglaganlik, mas'uliyatlilik va favqulodda vaziyatlarda harakat qilish ko‘nikmalari” uchun Toshkent prokurori nomidan minnatdorlik yorliqlari va sovg‘alar topshirildi.  

Ushbu xabarga fikringizni bildiring. Buning uchun avtorizatsiyadan oʻtishingiz kerak!
Top