21:01 / 12.02.2020
8
11051
Nurdinjon Ismoilov: Nega go‘sht narxi oshsa, e'tibor beramiz-u, dori narxiga esa yo‘q?

Oliy Majlis Qonunchilik palatasi spikeri Nurdinjon Ismoilov dori narxlarining o‘z-o‘zidan oshishini tanqid qilib, bu mavzu deputatlar tomonidan o‘rganilishi kerakligini aytdi.

Bugun, 12 fevral kuni Oliy Majlis Qonunchilik palatasi majlisida qator qonun loyihalari muhokamalari bo‘lib o‘tdi. Bu haqda Kun.uz muxbiri xabar beradi.

Palata spikeri Nurdinjon Ismoilov shifoxonalarda dori bilan bog‘liq muammolar, shifokorning dorixonalar bilan kelishib olish holatlari borligini aytdi.

«O‘tgan yil yakunida Bosh prokuraturada korrupsiyaga bag‘ishlangan yig‘ilishda ham korrupsiya bo‘yicha sog‘liqni saqlash tizimi birinchi o‘rinda qayd etilgan edi. Bu ham sohada ko‘proq ish qilish kerakligi ko‘rsatadi», – deb ta'kidladi Nurdinjon Ismoilov.

Deputatning fikricha, dorilar narxi oshib borayotgani ham muammoli holatlardan biri.

«Dorilar narxi kundan kunga oshyapti. Bu sohani kim nazorat qiladi, hayronman. Agar go‘shtning narxi oshsa, butun hukumat, butun sektor rahbarlari bozorni egallab olishadi, vaziyatni o‘rganishadi. Biroq dori narxi hadeb oshyapti-yu, lekin hech kim e'tibor bermaydi. Xalq bundan juda norozi. Nega buning nazorati bo‘yicha jamoatchilikdan yordam so‘ramaysizlar?» deya tibbiyot sohasi vakillariga yuzlandi Ismoilov.

«Endi shu narsani nazorat qilish uchun ham deputatlar joylarga chiqib, vaziyatni o‘rganadi», – deya qo‘shimcha qildi u.

Ma'lum qilinishicha, yaqin orada dori vositalari bo‘yicha parlament eshituvi bo‘ladi.

Ushbu xabarga fikringizni bildiring. Buning uchun avtorizatsiyadan oʻtishingiz kerak!
Top