11:33 / 19.02.2020
0
7903
Buxorodagi fojiali yo‘l-transport hodisalarining aksariyati qaysi yo‘lda sodir bo‘layotgani aytildi

Fojiali YTHning aksariyati A-380 “G‘uzor-Buxoro-Nukus-Beyneu” avtomobil yo‘lining 300 kilometrdan ortiq bo‘lgan cho‘l hududidan o‘tuvchi qismida kuzatilyapti

Foto: IIV YHXBB axborot xizmati

Buxoro viloyatida qayd etilgan o‘lim bilan bog‘liq yo‘l-transport hodisalarining aksariyati viloyat hududidan o‘tuvchi xalqaro ahamiyatga ega bo‘lgan A-380 “G‘uzor-Buxoro-Nukus-Beyneu” avtomobil yo‘lining 300 kilometrdan ortiq bo‘lgan cho‘l hududidan o‘tuvchi qismida sodir bo‘lmoqda.

O‘zbekiston Respublikasi IIV YHXBB axborot xizmati xabariga ko‘ra, mazkur yo‘l-transport hodisalari asosan Qoraqalpog‘iston Respublikasi va Xorazm viloyatidan Toshkent shahriga hamda respublikaning boshqa viloyatlariga qatnovchi haydovchilarning charchoqlik natijasida cho‘l hududida uxlab qolib, yo‘ldan chiqib ketib ag‘darilishi, o‘zidan oldinda harakatlanib borayotgan avtotransport vositalarining orqa tomoniga borib urilishi yoki qarama-qarshi tomondan harakatlanib kelayotgan avtotransport vositalari bilan to‘qnashuvi oqibatida kelib chiqmoqda.

Shularni inobatga olgan holda haydovchilardan:

o‘zlarida charchoq alomatlari sezilganda yo‘l yoqasida joylashgan dam olish joylari (kemping) hamda ovqatlanish shoxobchalarida to‘xtab dam olishlarini (kofe ichish, hushyorlikni oshiruvchi boshqa mahsulotlarni iste'mol qilish);

yo‘lga otlanayotganda ob-havo sharoitini inobatga olishni (ob-havo haroratining keskin o‘zgarishi, qor yog‘ishi va avtomobil yo‘llarida muzlamalar hosil bo‘lishi va hokazo);

imkon qadar temir yo‘l transportidan foydalanishni;

texnik nosoz transport vositalaridan foydalanmaslikni;

zarurat bo‘lmaganda tungi vaqtlarda harakatlanmaslikni;

piyodalardan yo‘lni kesib o‘tishda o‘ta hushyor bo‘lish so‘ralgan.

Ushbu xabarga fikringizni bildiring. Buning uchun avtorizatsiyadan oʻtishingiz kerak!
Top