O‘zbekiston Energetika vazirligi rahbariyati a'zolari 2020 yil 18 fevral kuni Vengriyaning tashqi ishlar va tashqi savdo vaziri Per Siyyarto boshchiligidagi delegatsiya a'zolari bilan muzokaralar o‘tkazdi.
Vazirlik matbuot xizmatiga ko‘ra, muzokaralar O‘zbekiston-Vengriya Iqtisodiy hamkorlik bo‘yicha hukumatlararo komissiyaning 5-majlisi doirasida o‘tkazildi. Uchrashuvda tomonlar O‘zbekistonning yoqilg‘i-energetika kompleksiga oid istiqbolli loyihalarni amalga oshirishda hamkorlik qilish imkoniyatlarini muhokama qildi.
Vengriya tomoni yadro energetikasi, shuningdek tabiiy gaz yetkazib berish masalalariga e'tibor qaratdi. Qayd etilganidek, Vengriya Iqlim bo‘yicha Parij bitimining a'zosi sifatida, atom energetikasisiz atmosferaga zararli chiqarish ko‘rsatkichlarini kamaytirishga erishib bo‘lmaydi, deb hisoblaydi.
Muzokaralar yakuni bo‘yicha tomonlar tinch atomdan foydalanish, xususan, O‘zbekistonda birinchi AES qurilishi sohasida hamkorlikni rivojlantirish haqida o‘zaro kelishuvga erishdi.
Vengriya tomoni O‘zbekiston uchun ajratiladigan stipendiyalar doirasida atom energetikasi bo‘yicha mutaxassislarni o‘qishga yuborish haqidagi taklifni ko‘rib chiqish fikrini ilgari surdi. Bunda Budapesht texnika universitetidagi yaxshi ta'lim dasturi va “Paksh” AESda amaliyotni o‘tkazish imkoniyati qayd qilindi.
Shuningdek, mintaqa gaz bozorini rivojlantirish masalalari va O‘zbekistonning ushbu sohadagi kelgusi rejalari muhokama qilindi.
Energetika vazirligi tomonidan energetika va neft-gaz sohalarida amalga oshirilayotgan islohotlar, tabiiy gaz negizida yuqori qo‘shilgan qiymatli mahsulot ishlab chiqarish bilan bog‘liq loyihalar haqida ma'lumot berildi.
Vengriya delegatsiyasiga may oyida Toshkentda an'anaviy Power Uzbekistan 2020 ko‘rgazma-konferensiyasi o‘tkazilishi haqida ma'lumot berildi va ular energetika sohasidagi ushbu muhim anjumanga taklif qilindi.
