22:06 / 19.02.2020
2
13763
Qozog‘iston televideniyesida Markaziy Osiyodagi birinchi virtual boshlovchi paydo bo‘ldi (video) 

Qozog‘iston televideniyesida virtual boshlovchi paydo bo‘ldi. U ta'til, maosh, grimga ehtiyoj sezmaydi va uzzukun ishlashga tayyor. 

Foto : Atameken Business

Qozog‘istonning Atameken Business telekanalida yangiliklar dasturidan birini virtual boshlovchi olib borishni boshladi. U Markaziy Osiyodagi birinchi virtual boshlovchi bo‘ldi. Bu haqda Atameken Business mediaxoldingida ma'lum qilingan.

i-Sanj deb nomlangan gologramma qozog‘istonlik aktyor Sanjar Madi qiyofasida ishlanib, kundalik iqtisodiy yangiliklar blokini olib boradi.

Virtual boshlovchi loyihasi ustida ishlagan jamoaning ta'kidlashicha, o‘ziga xos mazmundagi yangiliklarni texnologik personajlar taqdim qilishi kerak. Loyihaning “antiqaligi” ham aynan shundan - intellektual kontent va yangi texnologiyalarni birlashtirishdan iborat. 

Ta'kidlanishicha, kiber-boshlovchi i-Sanj yangiliklarni tezkor va bexato yoritishda yangi imkoniyatlarni ochadi. U ta'til, maosh, grimga ehtiyoj sezmaydi va uzzukun ishlashga tayyor.

Telekanal prodyuserining ta'kidlashicha, televideniyeda dramaturgiya kinodagidan kam bo‘lmagan darajada muhim va virtual boshlovchilar mualliflik dasturlarida insonlar o‘rnini bosa olmaydi. Loyihani neyron tarmoq yordamida mahalliy dasturchilar kuchlari bilan amalga oshirishga muvaffaq bo‘lingan. 

Ushbu xabarga fikringizni bildiring. Buning uchun avtorizatsiyadan oʻtishingiz kerak!
Top