10:02 / 24.02.2020
0
9563
Xitoyning to‘rtta provinsiyasi koronavirus tarqalishi xavfi darajasini pasaytirdi

XXR hukumati yangi kasallikka qarshi kurashdagi muvaffaqiyatni «rivojlanishning sotsialistik modeli» bilan izohladi

Foto: Ng Han Guan / AP

Xitoyning to‘rtta provinsiyasi koronavirus bilan kasallanish xavfi darajasi pasaygani haqida e'lon qildi. Bu haqda Reuters mahalliy tibbiyot rasmiylariga tayangan holda xabar bermoqda.

Yunnan va Guyjou provinsiyalari xavf darajasini birinchi darajadan (eng yuqori) uchinchi darajagacha, Guandun va Shansi esa birinchi darajadan ikkinchi darajagacha tushirdi.

Avvalroq, Gansu va Lyaonin provinsiyalarining tibbiy organlari xavf darajasi pasaytirilgani to‘g‘risida ma'lum qilgandi.

South Morning China Post xabariga ko‘ra, Xitoyning to‘rtta mintaqasi rasmiylari qarori Si Tszinpinning epidemiyani bartaraf etishda davlat katta yordam berishi haqida va'da qilgan nutqidan so‘ng ochiqlandi. XXR yetakchisi koronavirusni butun mamlakat uchun sinov deb atab, Xitoy ro‘y bergan hodisadan saboq chiqarishi lozimligini ta'kidladi.

Shu bilan birga, Si Tszinpin Kommunistik partiyaning harakatlari o‘z vaqtida va samarali bo‘lganini qayd etdi. Uning so‘zlariga ko‘ra, kasallik tarqalishiga tezkor reaksiya «Xitoy rivojlanishining sotsialistik modeli afzalliklarini namoyish etdi».

Shuningdek, XXR yetakchisining ta'kidlashicha, rasmiylarning eng muhim maqsadi Xubey provinsiyasidan, shu jumladan, mamlakat poytaxti Pekinga kasallik tarqalishining oldini olish bo‘lgan.

So‘nggi ma'lumotlarga ko‘ra, 2592 kishi koronavirus natijasida hayotdan ko‘z yumdi. Xitoyning materik qismidan tashqarida kasallanganlarning eng ko‘p soni Janubiy Koreya, Yaponiya va Italiyada qayd etildi.

Mavzu
Koronavirus
2019 yilning dekabr oyi oxirida Xitoyning Uxan shahrida noma'lum virus tarqala boshladi. Bu virus havo orqali odamdan odamga yuqadi va o‘limga olib keladi.
Barchasi
Ushbu xabarga fikringizni bildiring. Buning uchun avtorizatsiyadan oʻtishingiz kerak!
Top