09:17 / 10.03.2020
0
2317
Midlands Aviation Pacific Asia Urganchda uchuvchilar tayyorlash markazi ochmoqchi

Malayziya kompaniyasi Urganchda uchuvchilar tayyorlash markazi va logistika xabini ochishi mumkin

Foto: Transport vazirligi axborot xizmati

Transport vazirligida Malayziyaning Midlands Aviation Pacific Asia kompaniyasi ijrochi direktori Raj Daryraj boshchiligidagi delegatsiya a'zolari bilan uchrashuv bo‘lib o‘tdi.

Uchrashuvda O‘zbekiston transport vaziri Elyor G‘aniyev mamlakatimizda yangi investitsion loyihalarni amalga oshirishga qiziqish bildirayotgan xorijiy kompaniya vakillariga fuqaro aviatsiyasi sohasida amalga oshirilayotgan tub islohotlar haqida batafsil ma'lumot berdi.

Xususan, parvozlar geografiyasini kengaytirish, xorijiy aviakompaniyalarni yurtimiz aeroportlariga ko‘proq jalb etish maqsadida «Qarshi», «Nukus» va «Termiz» xalqaro aeroportlarida «beshinchi havo erkinligi» tartibini qo‘llagan holda, shuningdek «Buxoro» aeroportida chet davlatlar fuqarolarini tashishda «Ochiq osmon» rejimi joriy etilgani, shuningdek, «Navoiy» va «Termiz» aeroportlarida esa yuk tashuvlari uchun «yettinchi havo erkinligi» tartibini qo‘llagan holda “Ochiq osmon” rejimini joriy etish bo‘yicha ishlar olib borilayotgani ta'kidlab o‘tildi.

Midlands Aviation Pacific Asia kompaniyasi ijrochi direktori Raj Daryraj Urganch shahrida Phils kompaniyasi bilan hamkorlikda uchuvchilar tayyorlash markazi hamda xorijiy davlatlarga O‘zbekistondan yuklarni tashishga ixtisoslashgan zamonaviy logistika xabini ochish istagida ekanligini bildirdi va bu boradagi o‘z loyihalari taqdimotini o‘tkazdi.

Uchrashuv yakunida tomonlar mazkur loyihalarni hayotga tatbiq etish borasida maxsus ishchi guruhi tuzgan holda hamkorlikda ishlashga kelishib oldi.

Ushbu xabarga fikringizni bildiring. Buning uchun avtorizatsiyadan oʻtishingiz kerak!
Top