21:12 / 16.03.2020
67889
Singapur qanday qilib koronavirusga qarshi samarali kurasha oldi?

Singapur Xitoyga yaqin bo‘lishiga qaramasdan koronavirus tarqalishiga qarshi samarali kurashmoqda. Buning sababi - kasallikka chalinish bilan bog‘liq barcha holatlarni kuzatib borish va diagnostika tizimlarini zudlik bilan joriy etish.

Taniqli genetik Spenser Uellsning MIT Technology Review jurnalida yozishicha, Singapur hukumati koronavirusning asl xavfini tezlik bilan angladi va unga qarshi kurashish choralarini ko‘rdi.

2002-2003 yillardagi g‘ayrioddiy zotiljamga qarshi kurashishdagi tajribasiga tayangan holda Singapurda kasallikka chalingan har bir kishining boshqalar bilan muloqoti hushyorlik bilan aniqlandi. Natijada infeksiyaning bir odamdan ikkinchisiga yuqish holati ikki kun ichidayoq ma'lum bo‘ldi. Fevralda hukumat yoki tashkilotlar binolariga keladigan har bir kishi manzil va telefon raqamlarini taqdim etishi to‘g‘risida qaror chiqarildi. Bu bemorlarni aniqlashda tibbiyot «detektiv»larining ishini yengillashtirdi.

Virusga qarshi kurashishdagi muvaffaqiyatning ikkinchi omili — diagnostika testlarining zudlik bilan ishlab chiqilishi va joriy etilishi. Bu mamlakatga kelgan har bir kishida uch soat ichida koronavirus bor-yo‘qligini tekshirish imkonini berdi.

So‘nggi ma'lumotlarga ko‘ra, Singapurda koronavirusga chalinish bilan bog‘liq 243ta holat qayd etilgan, 109 bemor tuzalib ketgan, o‘lim holati yuz bermagan.

Mavzu
Koronavirus
2019 yilning dekabr oyi oxirida Xitoyning Uxan shahrida noma'lum virus tarqala boshladi. Bu virus havo orqali odamdan odamga yuqadi va o‘limga olib keladi.
Barchasi
Top