19:58 / 01.04.2020
7043
O‘zbekiston yuk mashinalarini Gruziya-Turkiya chegarasi orqali o‘tkazish tiklandi

Koronavirus tarqalishini kamaytirish borasida ko‘rilayotgan shoshilinch choralar sababli Turkiya hududiga xorijiy yuk tashuvchilarning kirishi cheklangan edi.

Foto: Flickr

Tashqi ishlar vazirligi holat bo‘yicha ma'lumot berdi.

Vazirlik axborot xizmati tarqatgan xabarga ko‘ra, Turkiya va Gruziyaning mas'ul vazirlik va idoralari bilan olib borilgan muzokaralar natijasida, mazkur masala ijobiy hal qilindi. Turkiya tomonidan olingan ma'lumotga ko‘ra, o‘zbekistonlik avtotashuvchilar Turkiya hududiga O‘zbekistondan chiqqan kunlaridan boshlab 14 kunlik muddat tugaganidan keyin kiritiladi.

Ta'kidlanishicha, Turkiya Bojxona idorasi va Savdo vazirligi 2020 yil 30 mart kechasidan boshlab O‘zbekiston yuk tashuvchi transport vositalarini kiritish tiklanganligini tasdiqladi. Bugunga qadar Gruziya-Turkiya chegarasini 50 dan ortiq yuk transportlari kesib o‘tdi.

«O‘zbekistonning Anqara va Boku shaharlaridagi elchixonalari vaziyatni nazoratga olgan, davlatlararo chegarada 14 kunlik muddat tugashini kutayotgan o‘zbekistonlik haydovchilar bilan aloqada bo‘lib turibdi», - deyiladi vazirlik xabarida.

Xorijiy davlatlar hududida bo‘lib turgan O‘zbekiston fuqarolariga zarur holatlarda mamlakatimizning chet eldagi elchixonalari va konsullik muassasalari huzurida tashkil etilgan operativ shtablarga murojaat qilishlari mumkinligini eslatib o‘tamiz.

Mavzu
Koronavirus
2019 yilning dekabr oyi oxirida Xitoyning Uxan shahrida noma'lum virus tarqala boshladi. Bu virus havo orqali odamdan odamga yuqadi va o‘limga olib keladi.
Barchasi
Top