20:49 / 01.04.2020
8721
Qirg‘izistonda bosh vazir o‘rinbosari va sog‘liqni saqlash vaziri almashtirildi

Bugun Qirg‘iziston parlamenti bosh vazirligiga Aida Ismoilova va sog‘liqni saqlash vaziri lavozimiga Sobirjon Abdukarimov nomzodlarini tasdiqladi. Nomzodlar prezident tomonidan ko‘rsatilgan.

Bir kun avval Qirg‘iziston prezidenti Sooranbay Jeenbekov raisligida Xavfsizlik kengashining toraytirilgan tarkibdagi navbatdagi majlisi o‘tkazilgan edi.

Jeenbekov koronavirusga qarshi respublika shtabi hamda Sog‘liqni saqlash vazirligi faoliyatini birinchi navbatda virus yuqtirganlar bilan kontakt qilgan shaxslar o‘z vaqtida aniqlanmagani tufayli qattiq tanqid ostiga oldi. Bu mamlakat hududida kasallik tarqalishining qo‘shimcha omili bo‘lib xizmat qilgan.

Ushbu yig‘ilish yakunlariga ko‘ra, bosh vazirning ijtimoiy masalalar bo‘yicha o‘rinbosari Oltinoy O‘murbekova va sog‘liqni saqlash vaziri Kosmosbek Cho‘lponboyev egallab turgan vazifasidan ozod qilingan. Prezident bu borada farmon imzolagan.

Oltinoy O‘murbekova va Kosmosbek Cho‘lponboyev
Foto: Kloop.kg

Yangi mulozimlarni vazifasiga tayinlash uchun parlamentda ovoz berish jarayonini o‘tkazildi. 24.kg xabariga ko‘ra, Aida Ismoilova uchun parlamentning jami 120 nafar deputatidan 91 nafar, Sobirjon Abdukarimov uchun 95 deputat ovoz bergan.

Qirg‘iziston bosh vazirining yangi o‘rinbosari Aida Ismoilova. Foto: kabar.kg
Qirg‘iziston yangi tayinlangan sog‘liqni saqlash vaziri Sobirjon Abdukarimov. Foto: kabar.kg

Spiker Dostonbek Jumabekov Aida Ismoilovada sohaviy qo‘mitalarda ishlash tajribasi borligini ta'kidlab, bu tajriba unga yangi ish o‘rnida qo‘l kelishini aytib o‘tdi. U shuningdek, Vazirlar Mahkamasining yangi a'zolari hukumatda koronavirus bilan bog‘liq joriy vaziyatdan chiqishda yordam bera olishlariga umid qildi.

Spiker shuningdek koronavirusga qarshi kurashish jamg‘armasiga 4 million qirg‘iz so‘mi tushganini ham e'lon qildi. Bu – parlament a'zolarining bir oylik maoshi.

Ma'lumot uchun, Qirg‘izistonda koronavirusga chalinganlar soni 111 nafarni tashkil etmoqda. Hozircha o‘lim holati qayd etilmagan.

Mavzu
Koronavirus
2019 yilning dekabr oyi oxirida Xitoyning Uxan shahrida noma'lum virus tarqala boshladi. Bu virus havo orqali odamdan odamga yuqadi va o‘limga olib keladi.
Barchasi
Top