12:50 / 02.04.2020
120260

«Vaziyat bir necha oy murakkabligicha qolishi ham mumkin» - Otabekov epidemiya qachongacha davom etishi haqida

Koronavirus epidemiyasi bilan bog‘liq vaziyat bir necha oy davomida murakkab holatda saqlanib turishi mumkin. Bu haqida Davlat bosh sanitariya inspektori Nurmat Otabekov aytib o‘tdi.

«Koronavirus epidemiyasining to‘xtashi haqida mutaxassislarning prognozlari turlicha. Gap shundaki, biz ilgari ma'lum bo‘lmagan infeksiya qarshisida turibmiz.

Lekin bu kasallikni (Covid-19) 2002 yilda atipik pnevmoniya epidemiyasi keltirib chiqargan og‘ir respirator sindrom (SARS) bilan solishtirib ko‘rilsa, vaziyat bir necha oy davomida murakkab bo‘lib turishini taxmin qilish mumkin.

Chunki SARS’ning kelib chiqish sababi ham koronavirus edi, faqat virusning boshqa tipdagisi bo‘lgan», dedi Nurmat Otabekov AOKAda o‘tkazilgan brifingda.

Bosh sanitariya inspektori epidemiyani issiq ob-havo to‘xtatishi ehtimoli yuzasidan yana bir bor izoh berdi.

«Koronavirus epidemiyasiga issiq ob-havoning ta'siri haqida yaqin oylardagi vaziyatni kuzatish asosidagina javob berish mumkin. Agar virus mavsumiy xarakterga ega bo‘lsa, unda kuz boshlanishi bilan kasallanishning yangi to‘lqini boshlanishi ehtimoli bor.

Hali litsenziyalanmagan bir tadqiqotga ko‘ra, kasallanishlarning 95 foizi -2-10 daraja haroratda kuzatilgan. Bu virusning nisbatan salqinroq ob-havoda faol bo‘lishini ko‘rsatadi», deya ta'kidladi Nurmat Otabekov.

Mavzu
Koronavirus O‘zbekistonda
15 mart kuni O‘zbekistonda koronavirusga chalingan ilk bemor aniqlandi.
Barchasi
Top