00:15 / 11.04.2020
47697
50 yil avval harbiylar tomonidan yaratilgan vosita koronavirusga qarshi samarali bo‘lib chiqdi

Rossiyalik olimlar koronavirusga qarshi “Mefloxin” vositasining samarali ekanini isbotlashdi. Bezgakka qarshi qo‘llanuvchi vosita virusning tsitopatik ta'siri (hujayralarda virus ko‘payishi bilan bog‘liq salbiy o‘zgarishlar) avj olishini to‘liq to‘sgan.

Foto: Reuters

Bu haqda Rossiya federal tibbiy-biologiya agentligi ma'lum qildi

“Mefloxin” hujayralarda 2 mkg/l miqdorda koronavirusning tsitopatik ta'siri avj olishini to‘liq bloklashi isbotlandi. Qon plazmasida bunday miqdorga vositaning insonda qo‘llashga ruxsat berilgan terapevtik dozalarida qabul qilingandan keyin erishiladi”, deb aytgan agentlik rahbari Veronika Skvorsova.

Uning aytishicha, vositaning klinik samaradorligini o‘rganish uchta ilmiy markazda olib borilmoqda.

“Mefloxin” bir marta 750 mg/sutka (250 mglik 3 ta tabletka) miqdorda qabul qilingandan keyin uning qon plazmasidagi maksimal miqdori birinchi kun davomida 1,51 mkg/l.ga yetadi. Vositani 500 mgdan qabul qilishni davom ettirganda uning qon plazmasidagi miqdori oshadi va 2-3-kun 2,7-3,8 mkg/l.ga yetib, virusning yo‘qolishini ta'minlaydi. Vositaning 250 mgdan (kuniga 1 tabletkadan) keyingi qabul qilinishi zarur miqdorni butun davolash kursi (7 kun) davomida va u yakunlangandan bir necha kun keyin ham saqlab turishga imkon beradi”, deb aytgan Skvorsova.

“Mefloxin” (boshqa nomi “Lariam”) bezgakning oldini olish va uni davolashda qo‘llanuvchi vosita bo‘lib, AQShdagi Uolter Rid nomidagi armiya ilmiy-tadqiqot institutida 1970-yillar boshida, Vetnamdagi urushdan keyin ishlab chiqilgan.

Ta'kidlanishicha, ushbu vosita Jahon sog‘liqni saqlash tashkiloti tavsiya qiladigan asosiy dori vositalari ro‘yxatiga kiradi. OAV ma'lumotlariga ko‘ra, “Mefloxin” Guantanamo bazasidagi mahbuslarda sinovdan o‘tkazilgan.

Mavzu
Koronavirus
2019 yilning dekabr oyi oxirida Xitoyning Uxan shahrida noma'lum virus tarqala boshladi. Bu virus havo orqali odamdan odamga yuqadi va o‘limga olib keladi.
Barchasi
Top