18:22 / 13.04.2020
13127
Lukashenko Belarusda koronavirusdan hech kim o‘lmaganini aytdi

Belarus prezidentining ta'kidlashicha, hech bir holatda o‘lim sababi koronavirus bo‘lmagan, hamma gap bemorlarda aniqlangan "surunkali kasalliklar guldastasida".

Foto: EPA / TASS

Belarus prezidenti Aleksandr Lukashenko mamlakatda hech kim koronavirusdan o‘lmasligiga va'da berdi. 

"Xavotir olishmasin. Mamlakatimizda hech kim koronavirusdan o‘lmaydi. Bu haqda omma oldida aytaman. Bunga qat'iy ishonaman", — dedi u.

Belarus prezidenti koronavirus hech bir holatda o‘lim sababi bo‘lmaganligini ta'kidladi.

“Odamlar qo‘rqyapti. Shuning uchun ularga aytmoqchiman: mamlakatimizda birorta ham inson koronavirusdan o‘lgani yo‘q. Birorta ham! Ular o‘zlarida aniqlangan "surunkali kasalliklar guldastasi"dan o‘ldi”, dedi u.

Lukashenkoning so‘zlariga ko‘ra, odamlar yurak yetishmovchiligi, qandli diabet, o‘pka yetishmovchiligidan vafot etmoqda.

“Yana shunday tashxislar borki, hatto o‘qishga qiynalaman. Bunga koronavirus ham qo‘shilyapti», — dedi Belarus prezidenti.

U Minsk koronavirusga qarshi xalqaro tajribadan kelib chiqayotganligini aytdi. Lukashenkoning bildirishicha, belarus shifokorlarida koronavirusni davolash uchun dorilar jamlanmasi mavjud.

Oxirgi ma'lumotlarga ko‘ra, Belarusda COVID-19 koronavirusiga chalinganlar 2578 kishini tashkil etadi, 26 kishi vafot etgan.

Mavzu
Koronavirus
2019 yilning dekabr oyi oxirida Xitoyning Uxan shahrida noma'lum virus tarqala boshladi. Bu virus havo orqali odamdan odamga yuqadi va o‘limga olib keladi.
Barchasi
Top