21:54 / 14.04.2020
83071
So‘m qulashda davom etmoqda: banklarda dollar kursi 10 ming so‘mdan oshdi

14 aprel oqshomida O‘zbekistondagi bir qator banklarda AQSh dollari kursi 10 ming so‘mlik nuqtadan o‘tdi.

Foto: Reuters

Kun davomida banklarda dollar oldi-sotdisi 9780-9850 so‘m koridorida amalga oshib, kechga yaqin xarid 10050 so‘m, sotuv 10150 so‘mgacha ko‘tarildi.

Hozirga qadar O‘zmilliybank, O‘zsanoatqurilishbank, Orient Finans Bank, Asaka bank, Aloqabank, Ipak yo‘li banki, Ipoteka bank, Ravnaq bank, Hamkorbank va Hi Tech bank dollar kursi 10 ming so‘mdan oshganini e'lon qildi.

Eslatib o‘tamiz, kecha Markaziy bank eksport tushumlari va xorijdan pul o‘tkazmalari hajmi keskin kamayganini ma'lum qilgan edi.

Jumladan, Rossiya va Qozog‘iston milliy valutalarining qadrsizlanishi ortidan, mart oyida O‘zbekistonga kirib kelgan pul o‘tkazmalari fevral oyiga nisbatan 23 foizga pasaygan, aprelning dastlabki 8 ish kunida esa mart oyining mos davriga nisbatan 3 barobarga qisqargan.

Eksport tushumlari esa mart oyida oldingi oyga nisbatan 10 foizga kamaygan.

Shunga qaramay, regulyator so‘m almashuv kursining qadrsizlanishi ehtimolini past baholamoqda – qisqa muddatli davrda so‘m almashuv kursi ma'lum bir kichik o‘zgarishlardan keyin o‘zining fundamental trendiga yaqin darajada shakllanishi prognoz qilingan.

Qayd etish kerak, so‘m devalvatsiyasi aprel oyi boshidan jadallasha boshladi. Respublika valuta birjasida dollar kursi 2 aprel kuni 9600 so‘m, 8 aprelda 9700 so‘mlik psixologik nuqtadan o‘tgan edi.

Ma'lumot uchun, 14 apreldan 1 AQSh dollarining so‘mga nisbatan rasmiy qiymati 9693,36 so‘m etib belgilangan.

Top