18:40 / 17.04.2020
8164
O‘zbekistonda koronavirusga chalinganlarni aniqlash bo‘yicha kuniga o‘rtacha 10 mingga yaqin tahlillar tekshirilmoqda – Bahrom Almatov

O‘zbekistonda koronavirus bilan kasallangan fuqarolar bilan muloqotda bo‘lganlarni aniqlash, kasallikni yuqtirganlarga tashxis qo‘yish uchun uzluksiz ishlayotgan virusologik laboratoriyalarda bir kunda o‘rtacha 10 mingga yaqin tahlillar tekshirilmoqda.

Foto: Reuters

Bu haqda Respublika davlat sanitariya-epidemiologiya osoyishtalik agentligi direktori Bahrom Almatov 17 aprel kuni AOKAda bo‘lib o‘tgan brifingda ma'lum qildi.

“O‘zbekistonda koronavirus bilan kasallangan fuqarolar bilan muloqotda bo‘lganlar bo‘yicha epidemiologik surishtiruv ishlari davom ettirilmoqda. Bu jarayonga barcha mutasaddi idoralarning xodimlari jalb etilgan.

Virusologik laboratoriyalarda test tizimlarini tekshirish ishlari davom etmoqda. Bu laboratoriyalarda uzluksiz ish jarayonida bir kunda o‘rtacha 10 mingga yaqin tahlillar tekshirilmoqda. Hozirgi kungacha jami 136 mingta tekshirish ishlari amalga oshirilgan.

Koronavirus infeksiyasini yuqtirganlik tashxisi laboratoriya tahlillari natijasi bo‘yicha qo‘yiladi. Buning uchun ikkita bosqichda test olinadi. Birinchi navbatda skrining testlari olinsa, kasallik gumon qilingan holatlarda tasdiqlovchi test tizimlaridan foydalanib kelmoqdamiz. Bu ishlar Jahon sog‘liqni saqlash tashkilotining bergan tavsiyalari va xalqaro tajribalar asosida amalga oshirilmoqda”, deya Bahrom Almatovning so‘zlarini keltirmoqda Kun.uz muxbiri.

Uning ta'kidlashicha, bugungi kunda O‘zbekistonda jami 274 ta karantin muassasasi belgilangan bo‘lib, shundan 214 tasida 22 ming kishi 14 kunlik karantinda saqlanmoqda. Bundan tashqari, 70 mingdan ortiq fuqaro uy sharoitida tibbiy nazoratga olingan.

Avvalroq O‘zbekistonda virus aniqlanmagan hudud qolmaganligi, Toshkent shahri, Buxoro va Xorazm viloyatlarida kasallanish yuqori ekanligi ma'lum qilingandi.

Sog‘liqni saqlash vazirligining bildirishicha, bemorlarning aksar qismi karantinda saqlangan fuqarolar orasidan aniqlangan bo‘lib, ularning kasalligi tasdiqlangach hududdagi yuqumli kasalliklarga ixtisoslashgan tibbiyot muassasalarga davolash uchun joylashtirilgan.Shu vaqtgacha tuzalgan bemorlar soni 140 nafarga yetgan, 4 kishi vafot etgan.

Mavzu
Koronavirus O‘zbekistonda
15 mart kuni O‘zbekistonda koronavirusga chalingan ilk bemor aniqlandi.
Barchasi
Top