23:40 / 23.04.2020
3977
Markaziy harbiy okrug harbiy xizmatchilari “Mehr-shafqat va salomatlik” jamg‘armasiga 515 million so‘m o‘tkazishdi 

Markaziy harbiy okrug tasarrufidagi  Jizzax, Navoiy va Samarqand garnizonlarida xizmat qilayotgan harbiy xizmatchilar tomonidan ixtiyoriy ravishda koronavirus infeksiyasi bilan kasallangan bemorlarni davolash uchun 515 million 390 ming so‘m mablag‘ xayriya qilindi. Bu haqda harbiy jurnalist G‘ayrat Madrahimov xabar berdi.  

Okrug qo‘shinlari tarkibidagi bo‘linmalar, harbiy qismlarda, nazorat o‘tish joylarida ko‘ngilli harbiylar tomonidan xayriya qutilari o‘rnatilgan bo‘lib, o‘tgan bir xafta vaqt ichida xayriya qutisiga kelib tushgan mablag‘lar “Mehr-shafqat va salomatlik” jamg‘armasiga o‘tkazib berildi.

“Markaziy harbiy okrug harbiy xizmatchilari bu kabi xayrli va savobli ishlarda faollik ko‘rsatishda davom etadi”, deyiladi xabarda.

Bugun O‘zbekiston bosh vaziri o‘rinbosari Jamshid Qo‘chqorov “Mehr-shafqat va salomatlik” jamg‘armasiga o‘tkazilgan pullar miqdori 71 milliard so‘mdan oshganini ma'lum qildi.  

Mavzu
Koronavirus O‘zbekistonda
15 mart kuni O‘zbekistonda koronavirusga chalingan ilk bemor aniqlandi.
Barchasi
Top