22:55 / 29.04.2020
4944
AQShda koronavirusga qarshi kurashayotgan shifokorlar sharafiga aviashou o‘tkazildi 

Nyu-Yorkda koronavirus epidemiyasi vaqtida shifokorlarga bag‘ishlangan America Strong (Amerika kuchli) deb nomlangan aviashou o‘tkazildi.

AFP axborot agentligining xabar berishicha, 28 aprelda ikkita aviatsiya eskadrilyasi – AQSh harbiy-havo kuchlari Thunderbirds guruhining 6 ta va Blue Angels guruhining 6 ta samolyoti ko‘rgazmali parvozlar amalga oshirgan. So‘ngra samolyotlar Filadelfiya tomon yo‘l olgan.

Samolyotlar shaharning barcha tumanlari uzra uchib o‘tgan. Thunderbirds eskadrilyasi sardori Jon Kalduellning ta'kidlashicha, uchuvchilar “shahar aholisi xavfsizligi uchun jonbozlik qilayotgan barchaga hurmat bajo keltirish”dan xursand bo‘lishgan. Ushbu parvozga bir oy davomida tayyorgarlik ko‘rilgan.

Bunday parvozlar AQShning turli shaharlarida may o‘rtasigacha davom etadi. Ulardan maqsad mamlakat aholisini, ayniqsa og‘ir sharoitlarda ishlayotgan shifokorlarni ilhomlantirish hamda uchuvchilarga mashg‘ulot o‘tkazish va o‘z malakasini yo‘qotmaslikda yordam berish hisoblanadi.

Avvalroq AQSh prezidenti Donald Tramp koronavirusga qarshi kurashayotganlar va virusdan vafot etganlar sharafiga harbiy aviatsiyaning ko‘rgazmali parvozlari o‘tkazilishini e'lon qilgandi.

Mavzu
Koronavirus
2019 yilning dekabr oyi oxirida Xitoyning Uxan shahrida noma'lum virus tarqala boshladi. Bu virus havo orqali odamdan odamga yuqadi va o‘limga olib keladi.
Barchasi
Top