15:20 / 22.05.2020
18047
Tojikistonda koronavirusga qarshi kurashda yordamlashgan shifokorlar O‘zbekistonga qaytib keldi

Ikki hafta muqaddam Tojikistonga yo‘l olgan o‘zbekistonlik shifokorlar guruhi Toshkentga qaytib keldi.

«Koronavirus infeksiyasiga qarshi kurashish, kasallikka chalingan bemorlarni samarali davolashda katta tajriba va malakaga ega bir guruh shifokor mutaxassislarimiz Tojikiston Respublikasiga yo‘l olishgan edi. 

Bugun tojikistonlik hamkasblari bilan hamkorlikda samarali faoliyat olib borgan shifokorlarimiz yurtimizga qaytishdi.

Ta'kidlash joizki, muxassislarimiz tomonidan safar davomida Tojikiston Sog‘liqni saqlash vazirligi mas'ullari hamda shifokorlari ishtirokida qator anjumanlar tashkil etilib, ularda O‘zbekistondagi epidemik vaziyat va kasallikning oldini olishda amalga oshirilgan chora-tadbirlar va erishilgan yutuqlar haqida batafsil ma'lumot berildi, o‘zaro fikr va tajriba almashindi. Shuningdek, kasallikka chalingan bemorlarni samarali davolash, shaxsiy himoya vositalaridan to‘g‘ri foydalanish, gigiyena qoidalariga rioya qilish va shifoxonalarda zararsizlantirish tadbirlarini amalga oshirish tartib-qoidalari bo‘yicha master-klass mashg‘ulotlari ham o‘tkazildi.

Yurtimizdan borgan anesteziolog-reanimatolog, pulmonolog, epidemiolog, infeksionist, virusolog kabi mutaxassislarimiz tojikistonlik hamkasblari bilan hamkorlikda qator tavsiyalar ishlab chiqishdi va shu asosda samarali chora-tadbirlar amalga oshirildi.

Jumladan, Tojikiston Sog‘liqni saqlash vazirligi tizimida koronavirus infeksiyasi bo‘yicha respublikadagi vaziyatni o‘rganish, zarur bo‘lganda, qo‘shimcha chora-tadbirlarni rejalashtirish va og‘ir bemorlarga malakali tibbiy yordam ko‘rsatish tadbirlarini amalga oshirish maqsadida yetuk mutaxassislardan iborat markaziy guruh tashkil etildi. Shuningdek, aholi tomonidan koronavirus infeksiyasi bo‘yicha tushgan murojaatlarni zudlik bilan ko‘rib chiqish va hal etish uchun, O‘zbekiston tajribasidan kelib chiqqan holda, Sall-markaz faoliyati yo‘lga qo‘yildi. Mobil kompaniyalar orqali aholini koronavirus kasalligidan himoya qilish maqsadida tizimli ravishda SMS targ‘ibot ishlari boshlab yuborildi.

Bundan tashqari, tashrif doirasida Tojikiston Sog‘liqni saqlash vazirligi, viloyat, tuman davolash profilaktika muassasalarining rahbarlari va yuqumli kasalliklar shifoxonalarining mutaxassislari ishtirokida qator onlayn videomuloqotlar o‘tkazildi.

Umuman olganda, yurtimiz mutaxassislarining 14 kun davomida tojikistonlik mutaxassislar bilan birgalikda olib borgan koronavirus infeksiyasining oldini olish hamda davolashga qaratilgan amaliy chora-tadbirlari katta samara berayotganligi ular tomonidan ham alohida e'tirof etildi. Darhaqiqat, o‘zbek-tojik xalqlari hamisha bir-biriga yelkadosh bo‘lib kelgan. Buni zarur ko‘mak va kerakli tavsiyalari bilan tojik xalqiga yaqindan yordam bergan fidoyi shifokorlarimiz misolida ham guvoh bo‘lishimiz mumkin. 

Ana shunday sharafli vazifani munosib tarzda bajarib qaytishgan tibbiyot xodimlari yurtimiz Sog‘liqni saqlash vazirligi mutasaddilari tomonidan tantanali ravishda, yuksak ehtirom bilan kutib olindi», deyiladi Sog‘liqni saqlash vazirligi Jamoatchilik bilan aloqalar bo‘limi xabarida. 

Tojikistonda bo‘lib qaytgan tibbiy guruh tarkibidagi barcha, ya'ni 8 nafar tibbiyot xodimi Sog‘liqni saqlash vazirligi tomonidan «O‘zbekiston Respublikasi sog‘liqni saqlash a'lochisi» ko‘krak nishoni bilan taqdirlandi.

Mavzu
Koronavirus O‘zbekistonda
15 mart kuni O‘zbekistonda koronavirusga chalingan ilk bemor aniqlandi.
Barchasi
Top