14:00 / 29.05.2020
57377
Navoiy viloyatida 5ta kasallik o‘chog‘i mavjud. Koronavirusga qarshi kurashda yordam uchun Toshkentdan maxsus guruh yuborilgan

Navoiy viloyatida karantin qoidalari kuchaytirilmoqda. Sog‘liqni saqlash vazirligi ushbu viloyatda koronavirusga qarshi kurashda yordam berish uchun Toshkent shahridan maxsus shifokorlar guruhi yuborilganini ma'lum qildi.

Foto: Sog‘liqni saqlash vazirligi

«So‘nggi kunlarda ayrim hududlarda aholi orasidan koronavirus infeksiyasiga chalinganlar uchrayotgani aholidan yana-da hushyor bo‘lib, karantin qoidalariga qat'iy amal qilish lozimligini ko‘rsatmoqda. Jumladan, yurtimizning bir qancha hududlari qatori, Navoiy viloyatida ham aholi orasida kasallikka chalinayotganlar uchrayotganligi tashvishli bo‘lmoqda.

Shundan kelib chiqqan holda, Sog‘liqni saqlash vazirligi tomonidan Tibbiyot xodimlarini kasbiy malakasini rivojlantirish markazi direktori va Sanitariya-epidemiologik osoyishtalik agentligi direktori o‘rinbosari boshchiligida yuqori malakali shifokor-olimlar, jumladan, epidemiolog, infeksionist, otorinolaringolog, reanimatolog, pulmonolog, xirurg hamda vrach-laborant kabi qator mutaxassislardan iborat maxsus guruh viloyatga yuborildi. Ular hududda koronavirus infeksiyasi tarqalishining oldini olish borasida amalga oshirilayotgan profilaktik va epidemiyaga qarshi tadbirlarni yanada kuchaytirish, bemorlarni samarali davolash borasida mahalliy mutaxassislarga yaqindan amaliy yordam ko‘rsatmoqda», deyiladi vazirlik xabarida.

Shu vaqtgacha viloyatda 119 kishida koronavirus infeksiyasi aniqlangan. 29 may holatiga ko‘ra, ulardan 12 nafari sog‘aygan, 107 nafar bemor davolanmoqda.

Tahlillarga ko‘ra, viloyatda kasallik, asosan, beshta o‘choq orqali tarqalgan. Jumladan, birinchi katta o‘choq Zarafshon shahrida, ikkincha va uchinchi o‘choqlar Xatirchi tumanida, to‘rtinchi o‘choq Konimex tumanida hamda beshinchi o‘choq Tomdi tumanida yuzaga kelgan. 

«Shundan kelib chiqqan holda, xududda karantin qoidalarini yanada  kuchaytirish maqsadida Davlat xavfsizlik xizmati, Milliy gvardiya, Ichki ishlar, prokuratura  xodimlari bilan birgalikda koronavirus infeksiyasi tarqalishining oldini olish, bemorlarni davolash hamda karantindagi fuqarolarni tibbiy kuzatuvga olishni yanada samarali yo‘lga qo‘yish borasida izchil faoliyat olib borilmoqda.

Jumladan, epidemik vaziyatdan kelib chiqib, asosiy uchoq bo‘lmish, Zarafshon shahri «qizil» hudud toifasiga kiritilgan. Bundan tashqari, joriy yil 26 may kunida kasalligi aniqlangan bemorlar (31 nafar) bilan muloqotda bo‘lgan 300 nafarga yaqin fuqaro karantinga olingan: shundan 104 nafari uy karantini, 182 nafari esa statsionar karantinga joylashtirilgan. Viloyatning yana qator tuman va shaharlarida ham yuzlab fuqarolar uy va statsionar karantinga olinib, qat'iy tibbiy kuzatuvga olingan», deyiladi xabarda.

Shuningdek, epidemiologik vaziyatdan kelib chiqib, tegishli maxsus komissiya qarori bilan joriy yil 8 maydan boshlab, bosqichma-bosqich Zarafshon shahridagi 11ta mahallada kuchaytirilgan karantin qoidalari saqlab qolinib, transport vositalarining harakatlanishi cheklanishi belgilandi. Bundan tashqari, Xatirchi tumanidagi 6ta mahallada ham karantin qoidalari kuchaytirilgan.

«Umuman olganda, yurtimizning ayrim hududlarida aholi orasida kasallanish holatlarining kuzatilayotgani aholidan ogoh bo‘lib, karantin qoidalariga amal qilgan holda o‘zi va yaqinlarining xavfsizligiga e'tiborli bo‘lishlari talab etiladi.

Ayni holatdan kelib chiqqan holda, Sog‘liqni saqlash vazirligi o‘zimizni va oilamiz xavfsizligini saqlash uchun aholidan yana bir bor karantin qoidalariga, jumladan, ko‘chaga sababsiz chiqmaslik, zarurat yuzasidan chiqqanda ijtimoiy masofani saqlash, jamoat joylarida to‘planmaslik, qo‘llarni tez-tez va yaxshilab yuvish, tibbiy niqob taqishda davom etish kabi qator ehtiyot choralarini ko‘rib, belgilangan qoidalarga qat'iy amal qilishlarini so‘raydi», deyiladi Sog‘liqni saqlash vazirligi Jamoatchilik bilan aloqalar bo‘limi xabarida.

Mavzu
Koronavirus O‘zbekistonda
15 mart kuni O‘zbekistonda koronavirusga chalingan ilk bemor aniqlandi.
Barchasi
Top