12:55 / 18.06.2020
7403
O‘zbekiston va Rossiya agrosanoat klasterlari tashkil etishni rejalashtirmoqda

Agrosanoat klasterlarida kungaboqar yog‘i, go‘sht va sut mahsulotlari, qishloq xo‘jaligi mahsulotlarini ishlab chiqarish va qayta ishlashning to‘liq siklini qamrab olinishi mo‘ljallanmoqda.

Joriy yilning 17 iyun kuni O‘zbekiston bosh vazirining o‘rinbosari Sardor Umurzoqov va Rossiya bosh vazirining o‘rinbosari Aleksey Overchuk hamraisligida kengaytirilgan O‘zbekiston - Rossiya hukumatlararo muzokaralari bo‘lib o‘tdi. 

Investitsiyalar va tashqi savdo vazirligi xabariga ko‘ra, tadbirda ikki mamlakatning asosiy vazirlik va idoralari rahbarlari ham ishtirok etib, ko‘p qirrali ikki tomonlama hamkorlikni rivojlantirishning bugungi holati va istiqbollarini muhokama qildilar.

Mavjud resurslarni hisobga olgan holda, ikki mamlakat hududida kungaboqar yog‘i, go‘sht va sut mahsulotlari, qishloq xo‘jaligi mahsulotlarini ishlab chiqarish va qayta ishlashning to‘liq siklini qamrab oluvchi agrosanoat klasterlarini yaratish imkoniyatlari o‘rganib chiqildi.

Bundan tashqari, ip-kalava, gazlama materiallari va trikotaj mahsulotlarini ishlab chiqarish, yog‘ochni qayta ishlash, elektrotexnika mahsulotlari va yengil avtomobillarini ishlab chiqarish bo‘yicha qo‘shma korxonalar tuzish bo‘yicha qator tashabbuslar ko‘rib chiqildi.

Kelishilgan loyihalar va tashabbuslarni joriy qilishni tezlashtirish va har oyda ularning amalga oshirish jarayonini o‘rganib borish hamda O‘zbekiston va Rossiya ishbilarmon doiralarini investitsion sheriklikni kengaytirish bo‘yicha mavjud imkoniyatlar va ikki tomonlama savdo hajmini oshirish mexanizmlari haqida xabardor qilib borish yuzasidan kelishuvga erishildi.

Shuningdek, logistika sohasida hamkorlik masalalari ko‘rib chiqildi: ikki mamlakat hududida meva-sabzavot mahsulotlarini saqlash va tashish uchun qo‘shma yuk-ekspeditorlik kompaniyalari, logistika va ulgurji taqsimlash markazlarini yaratish istiqbollari muhokama etildi. Tomonlarning umumiy fikriga ko‘ra, bunday markazlarning yaratilishi, transport xarajatlarini sezilarli darajada kamaytiradi, sifatni saqlab qolgan holda ishlab chiqaruvchidan yakuniy iste'molchiga tovarlarni tezda yetkazib berishni ta'minlaydi, bu O‘zbekiston va Rossiya o‘rtasidagi o‘zaro tovar aylanmasi hajmining sezilarli oshishiga olib keladi.

Top