11:46 / 30.06.2020
114421
O‘zbekistonda karantin choralari kuchaytirilmoqda

O‘zbekistonda karantin choralari yana kuchaytirilmoqda. Mamlakatda epidemiologik vaziyat yomonlashgani hisobga olinib, Respublika maxsus komissiyasi tegishli qarorlarni qabul qildi.

«Mamlakatimizda koronavirus infeksiyasiga chalinish holatlari so‘nggi kunlarda o‘sib borayotganligi va ayrim hududlarda yuqori ko‘rsatkichlar qayd etilayotgani, shu jumladan aholi o‘rtasida infeksiyani yuqtirish darajasi oshib borayotgani ham sanitariya-gigiyena nazorat tizimini yanada takomillashtirish va kuchaytirish zarurligini taqozo etmoqda.

Bu borada, birgina Toshkent shahri Yunusobod tumanida tashkil etilgan to‘y marosimi natijasida 76 kishining infeksiya bilan kasallanishi ro‘y bergani, jamoat joylarida ijtimoiy masofani saqlash va tibbiy niqoblar hamda antiseptik vositalardan foydalanish talablariga rioya etilmagani sababli Toshkent viloyatida zararlanish holatlari soni oshib ketganini misol keltirishimiz mumkin», deyiladi komissiya axborotida.

Komissiya qaroriga ko‘ra, 1 iyul kunidan respublikaning barcha hududlarida yirik buyum bozorlari hamda buyum savdosi bilan shug‘ullanadigan yirik savdo majmualari haftaning shanba va yakshanba kunlari sanitariya-dezinfeksiya ishlarini amalga oshirish uchun yopiladi.

«Qizil» va «sariq» hududlarda soat 07:00dan 23:00ga qadar jamoat joylarida uch kishidan ortiq to‘planish hamda 23:00dan 07:00ga qadar ko‘chalarda, ko‘p qavatli uylar va hovlilar oldida bo‘lish taqiqlanadi.

Bunda faqatgina fuqarolarning salomatligi yomonlashganligi, homiladorligi munosabati bilan shifokor ko‘rigidan o‘tish uchun davolash muassasasiga yoxud zarur dori-darmon xarid qilish maqsadida dorixonaga borib-kelishiga ruxsat beriladi.

Mazkur talablarni buzgan shaxslarga nisbatan belgilangan tartibda ma'muriy javobgarlik choralari qo‘llanadi.

Shuningdek, «qizil» va «sariq» hududlarda haftaning shanba va yakshanba kunlarida jamoat transporti harakati kamaytiriladi.

Mavzu
Koronavirus O‘zbekistonda
15 mart kuni O‘zbekistonda koronavirusga chalingan ilk bemor aniqlandi.
Barchasi
Top