Belarusning «Energetik-BGU» klubi 2 nafar yetakchisi bilan xayrlashdi.

Foto: energetikbgu.by

Pressbol xabariga ko‘ra, o‘tgan chempionatning eng yaxshi assistentlaridan biri, liberiyalik yarimhimoyachi Devid Tve Brestning «Dinamo» klubi bilan shartnoma imzoladi.

Shuningdek, chempionatning eng yaxshi to‘purari, o‘zbekistonlik Jasurbek Yaxshiboyev Soligorskning «Shaxtyor» klubiga o‘tdi. Futbolchini «Paxtakor»dan ijaraga olgan «Energetik-BGU» uni mavsum oxirigacha subijaraga berishga qaror qildi.

Eslatib o‘tamiz, Yaxshiboyev shu yilning yanvar oyida «Energetik-BGU» tarkibiga borib qo‘shilgan edi. Belarus chempionatining bu mavsumida futbolchi 14ta o‘yinda maydonga tushib, 9ta gol urgan va 3ta golga hammualliflik qilgan.

Soligorskning «Shaxtyor» klubi Belarus chempionatining 16 turidan keyin 30 ochko bilan peshqadamlik qilmoqda.