Bugun, 19 iyul kuni AOKAda o‘tkazilgan brifingda Mahalla va oilani qo‘llab-quvvatlash vazirligi matbuot xizmati rahbari Saodat Boymirzayeva 4 foizlik qo‘shimcha grant uchun tavsiyanoma olgan xotin-qizlar sonini ma'lum qildi.
Vazirlik rasmiysining ta'kidlashicha, 10 iyulga qadar 32 ming 98 nafar xotin-qizlar tavsiyanoma olish maqsadida hududiy tuman (shahar) mahalla va oilani qo‘llab-quvvatlash bo‘limlariga murojaat qilgan. Murojaat qilgan xotin-qizlarning 22 ming 900 nafarining hujjatlari joylardagi Ishchi guruhlari tomonidan o‘rnatilgan tartibda qabul qilib olingan.
«9 ming 197 nafar murojaatga ishchi guruhlar tomonidan shu kunning o‘zida og‘zaki tushuntirishlar berilgan. 4 ming 272 nafar xotin-qiz tomonidan taqdim qilingan hujjatlar belgilangan mezonlarga to‘g‘ri kelmagani uchun ularga rad etilish asoslari ko‘rsatilgan xulosalar yuborilgan», deya ma'lumot berdi Saodat Boymirzayeva.
Qayd etilishicha, 18 ming 628 nafar xotin-qizga mahalla va oilani qo‘llab-quvvatlash bo‘limlari tomonidan tegishli tartibda tavsiyanomalar berilgan.
Hududlar kesimida:
- Qoraqalpog‘iston Respublikasidan — 1370 nafar;
- Andijon viloyatidan — 1418 nafar;
- Buxoro viloyatidan — 836 nafar;
- Jizzax viloyatidan — 924 nafar;
- Navoiy viloyaidan — 762 nafar;
- Namangan viloyatidan 1898 nafar;
- Samarqand viloyatidan 1833 nafar;
- Surxondaryo viloyatidan 1681 nafar;
- Sirdaryo viloyatidan 828 nafar;
- Farg‘ona viloyatidan 1901 nafar;
- Toshkent viloyatidan 1142 nafar;
- Xorazm viloyatidan 1325 nafar;
- Qashqadaryo viloyatidan 2027 nafar;
- Toshkent shahridan 683 nafar xotin-qizga tavsiyanoma berilgan.
Tavsiyanoma olgan xotin-qizlar ro‘yxati 17 iyul kuni Davlat test markaziga taqdim etilgan.
