13:49 / 22.07.2020
8107
Tojikistonda 49 nafar imom va mulla koronavirus yuqtirgani ma'lum bo‘ldi

Tojikistonda diniy qo‘mita rasmiy ruxsatnomasiga ega bo‘lgan 49 nafar diniy rahnamolar koronavirusga chalingan. Ulardan biri, Asht nohiyasidan bo‘lgan imom xavfli virus yuqtirishi natijasida vafot etgan. «Aziya-Plyus» saytining xabar berishicha, bu haqda Tojikiston din ishlari qo‘mitasida bugun o‘tkazilgan matbuot anjumanida qo‘mita raisi Sulaymon Davlatzoda ma'lum qilgan.

Foto: Asia-Plus

 Davlatzodaning so‘zlariga ko‘ra, koronavirus yuqtirgan mullalar va imomlar janoza namozlarini o‘qish vaqtida Sog‘liqni saqlash vazirligi bergan ko‘rsatmalarga amal qilmagan. Shuningdek, ular janozadan keyin ham bir necha kunlab marhumlarning uyida fotihaxonliklarda qatnashgan.

Shuningdek, Davlatzoda hozirgi tahlikali kunlarda to‘ylarga ham 100-150 nafar odam chaqirish noto‘g‘ri ish bo‘lishi, 20-30 nafar odam chaqirib to‘y o‘tkazish lozimligi, ortgan narsalarni kam ta'minlangan qo‘shnilar va mahalladoshlarga tarqatilsa savob bo‘lishini aytib o‘tgan.

Matbuot anjumanida hozir bo‘lgan Tojikiston Ulamolar kengashi rahbari Saidmukarram Abduqodirzoda pandemiya sharoitida janoza namozlarini o‘qish uchun mayyitni masjidga olib kelish shart emasligini, uni xonadonlarda, iloji boricha kamroq odam ishtirokida, karantin qoidalariga rioya qilgan holda o‘qish lozimligini bildirgan.

Mavzu
Koronavirus
2019 yilning dekabr oyi oxirida Xitoyning Uxan shahrida noma'lum virus tarqala boshladi. Bu virus havo orqali odamdan odamga yuqadi va o‘limga olib keladi.
Barchasi
Top