00:45 / 28.07.2020
12661
Erdo‘g‘an Armaniston va Ozarboyjon mojarosi bo‘yicha Putinga qo‘ng‘iroq qildi

Turkiya va Rossiya prezidentlari Armaniston va Ozarboyjon o‘rtasidagi mojaroni muhokama qilishdi.

Foto: Rossiyskaya gazeta

Turkiya prezidenti Rajab Erdo‘g‘an va Rossiya prezidenti Vladimir Putin o‘rtasida telefon muloqoti bo‘lib o‘tdi. Bu haqda Kreml rasmiy saytida xabar berilgan.

Vladimir Putinning axborot xizmati ma'lumotiga ko‘ra, suhbat Turkiya tomonining tashabbusi bilan amalga oshirilgan. Tomonlar Kavkazortidagi arman-ozar mojarosini muhokama qilishdi. Rossiya prezidenti vaziyat taranglashishiga olib keladigan har qanday mojaroga yo‘l qo‘ymaslik kerak ekanini ta'kidlagan. Har ikki tomon masalani tinch yo‘l bilan hal qilish kerakligini ta'kidlashgan.

Putin va Erdo‘g‘an Tog‘li Qorabog‘dagi mojaroni avvalo xalqaro huquq normalari asosida, keyinchalik Armaniston va Ozarboyjonning manfaatlari inobatga olingan holda hal qilinishi kerakligini ta'kidlagan. Tomonlar koronavirusga qarshi o‘zaro kurashni ham yuqori baholab, 1 avgustdan har ikki mamlakat o‘rtasidagi aviaqatnovlar tiklanishini olqishlashdi.

Kreml rasmiy saytida yozilishicha, suhbat so‘ngida Vladimir Putin Turkiya prezidentini yaqinlashib kelayotgan Qurbon hayiti bilan tabriklagan.

Mavzu
Ozarboyjon-Armaniston mojarosi
12 iyul kuni Ozarboyjon shimoli-g‘arbidagi Tovuz viloyati hududida ikki davlat qo‘shinlari o‘rtasida to‘qnashuv sodir bo‘ldi.
Barchasi
Top