22:40 / 01.08.2020
12701
Lukashenko Rossiya Belarusga 200 nafar jangchini tashlashga uringanini aytdi

Belarus prezidenti Aleksandr Lukashenko Rossiya Belarus hududiga xususiy harbiy kompaniyaning 200 jangchisini tashlamoqchi bo‘lganligini yashirishga urinayotganligini aytdi.

"Bular Belarusga tashlash rejalashtirilgan 180 yoki 200 kishining birinchi guruhi deb tushunaman. Bu aniq ma'lumot. Endi esa "dum"ni yashirishga urinib, bu guruhning tashrifi to‘g‘risida biz bilan kelishishganini aytishlari safsata", - dedi Lukashenko.

Uning so‘zlariga ko‘ra, Belarusda rossiyalik sobiq yoki amaldagi harbiy xizmatchilar ishtirokida qanday tadbir o‘tkazilmasin, ikki davlatning tegishli idoralari hamkorlik qiladi.

"Bizda Belarusga harbiy xizmatchilar kelishiga faqat prezident ruxsat bera oladi. Texnika bilanmi, texnikasizmi, samolyotlar, vertolyotlar va hokazo. Hech kim hech qanday ruxsat bermagan", - dedi Lukashenko.

"Katta og‘alarimiz jim bo‘lib qoldi. Endi bu yigitlarni Istanbulga jo‘natishgani to‘g‘risida qichqirishmayapti. Hech qanday Istanbul bo‘lmagan va bo‘lishi ham mumkin emasdi. Bu guruhning maqsadi boshqa bo‘lganligi aniq. Tergovning vazifasi ana shu maqsadni aniqlash", - deb qo‘shib qo‘ydi u.

Eslatib o‘tamiz, 29 iyul kuni Belarusda «Vagner» XHK jangchilari ekani gumonlangan 33 nafar rossiyalik qo‘lga olingani xabar qilindi.  

Belarus rahbari mamlakat hududida rossiyaliklarning qo‘lga olinishini favqulodda hodisa deb atadi va Rossiya tomonidan tushuntirish talab qildi.

Belarus hukumati «Vagner» a'zolarining mamlakat poytaxtiga kelishini 9 avgust kuniga belgilangan prezidentlik saylovlari oldidan mamlakatdagi vaziyatni beqarorlashtirishga urinish sifatida baholadi.

Mavzu
Belarus-2020
2020 yilning 9 avgustida Belarusda prezidentlik saylovlari o‘tkaziladi. 26 yildan buyon mamlakatni boshqarayotgan Lukashenko bu safar ham nomzodini qo‘ygan.
Barchasi
Top