Mahalla va oilani qo‘llab-quvvatlash vazirligi matbuot kotibi Saodat Boymirzayeva so‘nggi olti oy ichida xotin-qizlar bandligini ta'minlash bo‘yicha qilingan ishlar haqida ma'lumot berdi.
«O‘tgan davr mobaynida yurtimizda ijtimoiy sharoiti og‘ir bo‘lgan xotin-qizlarning 14 mingdan ortig‘i doimiy daromad oladigan, 22 mingdan ortig‘i haq to‘lanadigan jamoat ishlari bilan ta'minlandi. Tadbirkorlikka qiziqishi bo‘lgan 4 ming 404 nafar xotin-qizlar o‘rnatilgan tartibda tadbirkorlik sohalariga jalb etildi», dedi vazirlik matbuot kotibi AOKAda o‘tkazilgan brifingda.
Vazirlik vakili qo‘lida hunari bor xotin-qizlardan 1448 nafarining hunarmandchilik, 301 nafarining kasanachilik sohalaridagi tashabbuslari qo‘llab-quvvatlangani, 13 ming 402 nafar xotin-qizlar kasbga o‘qitish markazlarida kasbga tayyorlanib, malakasi oshirilganini ma'lum qilgan.
Shuningdek, qiziqishi bor, ammo zarur bilim va ko‘nikmalarga ega bo‘lmagan 2191 nafar ayollar xotin-qizlar tadbirkorlik markazlari tomonidan tikuvchilik, pazandachilik hamda tadbirkorlik yo‘nalishlaridagi o‘quv kurslarida o‘qitilgan.
