11:58 / 11.09.2020
1822
Mamlakatda nogironligi bor bo‘lgan shaxslar uchun «to‘siqsiz muhit»ni shakllantirishimiz lozim – Senat Raisi

Senatning yettinchi yalpi majlisida parlament yuqori palatasi raisi Tanzila Norboyeva nogironligi bor bo‘lgan shaxslar muammolari yuzasidan amalga oshirilishi zarur bo‘lgan jihatlarga urg‘u berdi.

Foto: Senat matbuot xizmati

«Nogironligi bo‘lgan shaxslarning huquqlari to‘g‘risida»gi Qonun haqiqatan ham o‘ta muhimdir. Mazkur yo‘nalishda yillar davomida talay muammolar to‘planib qolganini hammamiz yaxshi bilamiz. Shu jumladan, nogironligi kundek ravshan bo‘lgan insonlarni har safar qayta-qayta ko‘rikdan o‘tkazish, tekshirish amaliyoti ham yo‘q emas. Qonunda bunday holatlarga yo‘l qo‘ymaslik, nogironlikni belgilash jarayonini soddalashtirish bo‘yicha aniq normalar belgilanganini ham e'tirof etishimiz kerak.

Yana bir muhim masala, nogironligi bo‘lgan shaxslar bilan ishlashda statistikani tartibga solish kerak. Nogironlik masalasini tahlil qilish, nogironligi bor shaxslarni har tomonlama qo‘llab-quvvatlash, ularni ijtimoiy hayotga to‘liq integratsiya qilish uchun bunday shaxslar, ularning soni, istiqomat qilayotgan hududlar, nogironlik darajasi hamda shu kabi muhim jihatlar to‘g‘risida aniq ma'lumotga va tasavvurga ega bo‘lishimiz shart. Aks holda, amalga oshiriladigan ishlar to‘liq bo‘lmaydi, qaysidir qatlam, qaysidir insonlar e'tibordan chetda qolib ketaveradi.

Bundan tashqari, xalqaro mezonlardan kelib chiqib, mamlakatda nogironligi bor shaxslar uchun “to‘siqsiz muhit”ni shakllantirishimiz lozim», deya Tanzila Norboyevaning so‘zlarini keltirmoqda Senat matbuot xizmati.

Senat raisi bu borada muammolar yetarli ekanini ta'kidladi.

«Kundalik hayotimizda – transport, ovqatlanish shoxobchalari, xizmat ko‘rsatish obektlari, madaniy-ko‘ngilochar maskanlarda nogironligi bor shaxslar uchun zarur sharoitlar yaratilmaganiga ko‘p duch kelamiz. Tabiiyki, bu ularning haqli e'tirozlariga sabab bo‘lmoqda.

Qolaversa, nogironligi bor shaxslarni ijtimoiy hayotga integratsiya qilishga ustuvor ahamiyat qaratish kerak. Ular jamiyatning to‘laqonli a'zosi ekanliklarini doimo his qilishlari lozim. Avvalo, bu masalaga jamiyat qarashini, munosabatini o‘zgartirish kerak. Bu esa, ishni o‘rta va uzoq muddatli, aniq strategiya va yo‘nalishlarga asoslangan holda tashkil qilishni talab etadi. Bunda nafaqat tashkiliy-huquqiy, balki axloqiy mezonlarga ham ahamiyat qaratish maqsadga muvofiq», dedi Norboyeva.

Top