13:31 / 11.10.2020
114198
«Grin kard» anketasini mustaqil va to‘g‘ri to‘ldirish bo‘yicha yo‘riqnoma

Kun.uz grin-karta anketasini bexato to‘ldirish bo‘yicha yo‘riqnomani taqdim etadi. Uning yordamida ingliz tilini bilmaganlar ham firibgarga uchrab qolish ehtimolisiz, bepul va mustaqil tarzda ro‘yxatdan o‘tishlari mumkin.

Foto: Getty Images

Diversity Visa uchun arizalar 2020 yilda 7 oktyabrdan 10 noyabrgacha qabul qilinmoqda. Ariza topshirish maxsus sayt orqali, bepul amalga oshiriladi.

Elektron anketani to‘ldirish vaqti – 30 daqiqa. Shu sababli anketa to‘ldirishni boshlashdan oldin:

  • Xorijga chiqish pasportingiz bo‘lishi kerak (u qanday olinadi?)
  • Suratga tushing (batafsil 8-bandda)
  • Pochta indeksingizni aniqlab oling (batafsil 9-bandda)
  • Elektron pochtangiz bo‘lmasa, ochib oling (batafsil 12-bandda)
  • Brauzeringiz yangi ekani va internet barqaror ishlayotganiga ishonch hosil qiling.

Barchasi shay bo‘lsa, dvprogram.state.gov saytiga kirib, Begin Entry yashil tugmasini bosing. Keyingi sahifada sizdan suratdagi harf va raqamlarni kiritish so‘raladi. Kapchani o‘qiy olmasangiz, uning o‘ng yonidagi tugmani bosib, yangilashingiz mumkin. Bu sizning «dasturiy robot» emasligingizni isbotlash uchun kerak.

Anketaga kiritiladigan barcha ma'lumotlar xorijga chiqish pasportingizdagi bilan aynan bir xil bo‘lishiga e'tibor bering. Quyida anketadagi savollarning tartib raqami bo‘yicha to‘ldirish ko‘rsatmalarini sanab o‘tamiz.

Anketa to‘ldirishda so‘zlarni to‘liq bosh harfda (ESHMAT) yoki faqatgina birinchi harfini (Eshmat) bosh harfda yozish mumkin, bu ahamiyatsiz. Muhimi, faqat lotin harflaridan foydalanish zarur.

1. Last/Family Name – familiya; First Name – ism. Middle Name – ikkinchi ism, bu o‘zbekistonliklarga taalluqli emas, shu sabab No Middle Name deya belgilash lozim.

2. Jinsingizni ko‘rsating: Male – erkak; Female – ayol.

3. Tug‘ilgan sana (raqamlarda kiritiladi): Month oy, Day kun, Year – yil. E'tibor bering, birinchi bo‘lib oy yoziladi.

4. Siz tug‘ilgan shahar. 2018 yil holatiga, O‘zbekistonda 30ta shahar mavjud. Shaharlarda tug‘ilgan fuqarolar uchun bu bandda muammo bo‘lmaydi: shahar nomi lotin alifbosida kiritiladi xolos. Boshqa holatlarda, ya'ni tug‘ilgan joyi shahar maqomida bo‘lmagan kishilar tug‘ilganlik haqidagi guvohnomada ko‘rsatilgan joy (aholi yashash punkti) nomini kiritishlari maqsadga muvofiq. Masalan, Ketmontepa QFY, Navruz MFY.

Bu bandda faqatgina aholi punkti nomini ko‘rsatish, ya'ni tuman yoki viloyatni yozmaslik talab etilgan. Shu bois O‘zbekiston fuqarosi pasportidagi tug‘ilgan joyi (Place of birth)da nima yozilgan bo‘lsa, bu bandga shuni ko‘chirib qo‘yish har doim ham to‘g‘ri emas. Chunki pasportda Toshkent shahridan boshqa hududlarda dunyoga kelgan fuqarolarning tug‘ilgan joyi sifatida ular tavallud topgan viloyatlar yoki Qoraqalpog‘iston Respublikasi ko‘rsatilgan.

Agar tug‘ilgan shahringiz noma'lum bo‘lsa, Birth City Unknown (Tug‘ilgan shahrim ma'lum emas) katakchasini belgilang.

5. Siz tug‘ilgan mamlakat. Ro‘yxatdan O‘zbekistonni tanlaymiz (Uzbekistan).

6. O‘zbekistonda tug‘ilgan O‘zbekiston fuqarolari oltinchi bandga tegmay o‘tib ketishlari mumkin (Yes katakchasi avtomatik belgilanib turadi). Bu band tug‘ilgan davlati lotereyada qatnashadigan davlatlar ro‘yxatida bo‘lmagan shaxslar uchun.

7. Pasport ma'lumotlari. 1-banddagi kabi ism va familiyangizni kiritib, No Middle Name katagini belgilaysiz.

  • Passport Number'ga xorijga chiqish biometrik pasportingiz seriya va raqami;
  • Passport Expiration Date'ga pasportning amal qilish muddati (oy, kun, yil tartibida – yana e'tibor bering, pasportdagidan farqli ravishda, anketaning bu yerida ham birinchi bo‘lib oyni ko‘rsatish kerak);
  • Country/Authority of Issiance pasport berilgan mamlakatga O‘zbekistonni ko‘rsating.

Fuqaroligi bo‘lmagan shaxslar 7-bandning «B» qismi katakchasini belgilab, birinchi variantni (Stateless – fuqaroligi yo‘q) tanlaydilar.

8. Fotosurat. O‘zingizning oxirgi 6 oy ichida tushgan suratingizni joylang. Suratga qo‘yiladigan talablar talaygina, shu bois eng yaxshisi – suratxonaga borib, suratkashga grin-karta uchun rasmga olib qo‘yishini so‘rash.

Olingan rasmni quyidagi rasmiy saytda keltirilgan namunalarga mosligini tekshiring. Barchasi ko‘ngildagidek bo‘lsa, rasmni fleshkangiz, telefoningiz yoki Telegram'ingizga o‘tkazib oling.

Eslatib o‘tamiz, rasmga kameraga qarab, oq yoki boshqa ochroq rangdagi fonda, ko‘zoynak va kepka kabi yuzni to‘suvchi detallarsiz tushish kerak. Rasmga soya tushib turmasligi zarur. Agar ro‘molda bo‘lsangiz, ro‘mol yuzingizni to‘sib turmasligiga e'tibor qiling.

Suratning texnik ko‘rsatkichlariga kelsak, foto JPEG formatda, maksimal 240 KB hajmda, o‘lchami 600x600dan 1200x1200gacha piksel oralig‘ida, 24 bit rang chuqurligida bo‘lishi kerak.

9. Pochta manzili. Bu sizning yoki biror yaqiningizning manzili bo‘lishi mumkin. Manzil sifatida istagan davlatingizni belgilashingiz mumkin.

  • In Care Of – bu yerga pochta manzilidagi shaxsning ismi va familiyasi yoziladi. Unga o‘zingizning ism-familiyangizni yozsangiz ham bo‘ladi.
  • Address Line 1 – ushbu bandda ko‘cha nomi, uy va xonadon raqami ko‘rsatiladi. Pochta indeksi ko‘rsatilmaydi. Ikkinchi qator (Address Line 2) joy yoki ko‘cha nomi birinchi qatorga sig‘maganda yozish uchun ishlatiladi; agar sizda birinchi qatorga siqqan bo‘lsa, bu qator bo‘sh qoldiriladi.
  • City / Town – yashash joyining nomi.
  • District / Country / Province / State – tuman / o‘lka / viloyat / okrug (shtat) nomi. Agar Toshkent shahrida yashasangiz, bundan oldingi bandda uni ko‘rsatgan bo‘lasiz, lekin bu katak bo‘sh qolishi mumkin emas, shu bois ikkinchi marta Toshkent deb yozib qo‘yasiz. Qolgan barcha shahar va tumanlar esa qaysidir bir viloyat yoki Qoraqalpog‘iston Respublikasi tarkibiga kiradi.
  • Postal Code / Zip Code – pochta indeksi. Pochta indeksini «O‘zbekiston pochtasi» rasmiy saytining ushbu sahifasida keltirilgan quyidagi fayl (arxivlangan excel-fayl) orqali bilib olishingiz mumkin. Agar siz yashaydigan joyning pochta indeksi bo‘lmasa, No Postal Code / Zip Code katakchasini belgilab qo‘yasiz.

10. Country Where You Live Today – Siz hozir yashayotgan mamlakat. Ro‘yxatdan o‘tayotgan vaqtingizda qaysi davlatda yashayotganingizni ko‘rsatish zarur.

11. Phone Numer – telefon raqamingizni xalqaro formatda kiriting. Masalan, +998901234567.

12. E-mail. Birinchi qatorga elektron pochta manzilingizni, ikkinchi qatorga shu manzilni qaytadan ko‘chirib yozing. Elektron pochtangiz bo‘lmasa, Google, Yandex kabilardan 1-3 daqiqa ichida ochib olishingiz mumkin.

13. Bugungi kun holatiga siz egallagan ta'limning eng yuqori darajasi qaysi? Ko‘rsatilgan variantlardan birini tanlash lozim.

• Primary school only – faqat boshlang‘ich maktab
• High School, no degree – o‘rta maktab, lekin shahodatnomasi yo‘q
• High School, degree – o‘rta maktab, shahodatnomaga ega (akademik litseyni tamomlaganlar ham shu bandni tanlashadi)
• Vocational School – kasb-hunar kolleji
• Some University Courses – to‘liqsiz oliy (bakalavriat talabalari shu bandni tanlashadi)
• University Degree – oliy ma'lumot (bakalavr darajasiga ega fuqarolar uchun)
• Some Graduate Level Courses – bir qancha magistratura darajasidagi kurslar (magistratura talabalari shu bandni tanlashadi)
• Master’s Degree – magistr darajasi
• Some Doctorate Level Courses – Tugallanmagan aspirantura/doktorantura (aspirantura va doktorantura tadqiqotchilari shu bandni tanlashadi)
• Doctorate Degree – doktorant darajasi

14. Oilaviy holatingiz. Ko‘rsatilgan variantlardan birini tanlash lozim.

  • Unmarried – Hech qachon turmush qurmaganman.
  • Married and my spouse is NOT a U.S. citizen or U.S. Lawful Permanent Resident (LPR)  – Oila qurganman, turmush o‘rtog‘im AQSh fuqarosi emas yoki AQShda yashash huquqiga ega emas.
  • Married and my spouse IS a U.S. citizen or U.S. Lawful Permanent Resident (LPR) – Oila qurganman, turmush o‘rtog‘im AQSh fuqarosi yoki AQShda yashash huquqiga ega. Ushbu ikki banddan birini siz turmush o‘rtog‘ingiz bilan anchadan beri yashamayotgan bo‘lsangiz-u, lekin qonuniy nikoh mavjud bo‘lganda ham belgilaysiz, hattoki nikohingiz bekor qilinish bosqichida-yu, lekin ariza to‘ldirayotgan vaqtingizda nikoh o‘z kuchida bo‘lsa ham.
  • Divorced – Ajrashganman.
  • Widowed – Turmush o‘rtog‘im vafot etgan.
  • Legally Separated – MDH davlatlarida Legally Separated holatining yuridik asosi yo‘q, shu bois bu bandni belgilash suhbat jarayonida arizani rad etishga sabab bo‘lishi mumkin.

Agar siz shar'iy nikoh bilan yashayotgan bo‘lsangiz-u, lekin hali qonuniy nikohdan o‘tishga ulgurmagan bo‘lsangiz, Married bandini tanlay olmaysiz. Birinchi turmushiga unashtirilganlar ham Unmarried bandini tashlashi zarur.

15. Number of Children – farzandlar soni. Bu yerga 21 yoshga to‘lmagan barcha farzandlaringiz sonini (nikohdagi farzandingiz bo‘lishi shart emas) ko‘rsatasiz. Faqatgina AQSh fuqarosi yoki u yerda doimiy yashovchi farzandingiz hisobga kiritilmaydi. Ushbu bandga farzandlaringiz sonini raqam bilan yozasiz; agar farzandingiz bo‘lmasa, nol yozasiz.

Ushbu bandda xotiningiz/eringizning avvalgi nikohidagi farzandlarini ham yozasiz (21 yoshga to‘lmaganlarini). Xotiningiz/eringizning o‘zi boqib olgan farzandini ko‘rsatish shart emas, uni o‘sha arizachining o‘zi ko‘rsatadi.

Shundan so‘ng yozganlaringizni bir tekshirib chiqing va Continue (Davom etish) tugmasini bosing.

Turmush o‘rtog‘ingiz va farzandlaringizni ko‘rsatgan bo‘lsangiz, arizaning ikkinchi qismi ochiladi. Ikkinchi qismga ularning ma'lumotlarini yuqoridagi kabi to‘ldirib chiqasiz. Har kim uchun o‘zining rasmi bo‘lishi shart.

Agar turmush o‘rtog‘ingizning o‘zi ham lotoreyada qatnashishni istasa, alohida anketa to‘ldiradi. Ikkinchi qismga esa sizning ma'lumotlaringizni yozadi. Bunday holatda yutish ehtimoli ortadi.

Barcha jarayonlar tugaganidan so‘ng, Continue tugmasi bosiladi. Shundan so‘ng ochilgan sahifa orqali siz anketani bir qator ko‘zdan kechirib chiqishingiz lozim. Xatoliklar bo‘lsa, ortga qaytib, to‘g‘irlash mumkin.

Barchasi joyida ekaniga ishonch hosil qilganingizdan so‘ng, yashil rangli Submit tugmasini bosasiz. Anketa muvaffaqiyatli to‘ldirilgani haqidagi sahifa ochiladi. Bu sahifada ism-sharifingiz, anketa to‘ldirilgan sana, natijani tekshirish kodi (16 belgidan iborat) joy olgan. Avvaliga darhol sahifani telefoningiz yordamida rasmga tushirib oling. Shundan so‘ng sahifa yuqorisidagi Print (Chop etish) tugmasi orqali printerdan chiqarishingiz yoki kodni biror ishonchli joyga yozib olishingiz zarur.

Lotereya natijalari 2021 yil 8 may kuni dvprogram.state.gov saytida e'lon qilinadi. Tanlangan arizachilar keyingi bosqichlardan o‘ta olsa, 2022 yilda AQShga ko‘chib ketishi mumkin bo‘ladi.

Top