“Ketdingmi – ortga qaytolmaysan, o‘sha katta pul topish uchun ketgan joyingda ishlab yuraverasan", - dedi Lukashenko.
Belarus prezidenti Aleksandr Lukashenko Polshaga ishlashga ketayotgan shifokorlarni mamlakatga qaytib kiritmaslik bo‘yicha topshiriq berdi. Bu haqda BelTA agentligi xabar qilmoqda.
"Shifokorlarimizni koronavirusga qarshi kurashda davlat va aholiga yordam berish uchun ayniqsa Polshaga chaqirishmoqda. Ogohlantirib qo‘ymoqchiman: bizda ortiqcha shifokor yo‘q. O‘zimizning odamlarni davolashimiz kerak. Biroq hech kimni ushlab turmaymiz. Ammo tushunib olinglar: ketdingmi – ortga qaytolmaysan, o‘sha katta pul topish uchun ketgan joyingda ishlab yuraverasan", - dedi Lukashenko.
U "bu so‘zlar tahdid emas, balki hukumatga berilgan buyruq" ekanligini ta'kidladi.
"Shuning uchun ko‘proq pulni istaganlar yoki valutadan ko‘zlari yashil rangga kirganlarga to‘sqinlik qilmagan holda barchani o‘z joyiga qo‘yib qo‘yish kerak", - dedi Belarus prezidenti.
Belarus koronavirus pandemiyasi boshlanganidan beri mamlakatda karantin joriy etmadi. Respublikada 1 oktyabrdan ko‘ngillilarda Rossiyada ishlab chiqarilgan "Sputnik V" vaksinasini sinash boshlandi.
