16:34 / 16.11.2020
15107
9 oyda 129 mlrd so‘mlik budjet mablag‘larining asossiz sarflanishi holatlari aniqlangan

Ayni kunlarda Qonunchilik palatasi fraksiyalari davlat budjeti va davlat maqsadli jamg‘armalari budjetlarining 2020 yil 9 oyi yakuni ijrosi to‘g‘risida tayyorlangan hisobot bilan yaqindan tanishmoqda.

Kun.uz muxbirining xabar berishicha, muhokamalar jarayonida davlat budjetining asossiz sarflanishi hamda tovar moddiy boyliklardagi kamomadlar huquqiy normalar yaratilgan bo‘lishiga qaramasdan, yildan yilga ortib borayotganligi deputatlarning e'tirozlariga sabab bo‘lgan.

Jumladan, o‘tgan 9 oy davomida budjet mablag‘larining maqsadli foydalanilishi yuzasidan o‘tkazilgan nazorat tadbirlarida 129,1 mlrd so‘m budjet intizomining buzilganlik holatlari aniqlangan. Ko‘rilgan chora-tadbirlar natijasida 96 mlrd so‘mi (74 foiz) mablag‘lar budjetga qaytarilgan.

Quyidagi vazirliklarda eng ko‘p qonunbuzilish holatlari va boshqa xato-kamchiliklarga yo‘l qo‘yilgan:

Xalq ta'limi vazirligi tizimida o‘tkazilgan 487ta nazorat tadbirlarining 389tasida 40,7 mlrd so‘m miqdorida qonunbuzilish holatlari aniqlangan;

Sog‘liqni saqlash vazirligi tizimida o‘tkazilgan 465ta nazorat tadbirlarining 345tasida 22 mlrd so‘m miqdorida qonunbuzilish holatlari aniqlangan;

Maktabgacha ta'lim vazirligi tizimida o‘tkazilgan 200ta nazorat tadbirlarining 159tasida 10,7 mlrd so‘m miqdorida qonunbuzilish holatlari aniqlangan;

Uy-joy kommunal xizmat ko‘rsatish vazirligi tizimida o‘tkazilgan 58ta nazorat tadbirlarining 47tasida 6,3 mlrd so‘m miqdorida qonunbuzilish holatlari aniqlangan.

Top