20:21 / 27.11.2020
3250
Shimoliy koreyalik hakerlar AstraZeneca xodimlariga hujum uyushtirdi

Shimoliy koreyalik hakerlar Britaniyaning koronavirusga qarshi vaksina ishlab chiqqan AstraZeneca kompaniyasi xodimlari qurilmalarini buzib kirishga uringan. Bu haqda manbalarga tayanib Reuters axborot agentligi xabar berdi.  

Foto: Reuters

Ma'lumotlarga ko‘ra, hujum kompaniyaning ko‘plab xodimlari, jumladan vaksina ustida ishlagan mutaxassislariga qarshi qaratilgan bo‘lgan

Hakerlar LinkedIn va WhatsApp messenjerlarida o‘zlarini ishga yollovchilar deb tanishtirib, kompaniya xodimlariga ish taklif qilishgan. Shundan keyin hakerlar ularga vakansiya ta'rifi keltirilgan hujjatlarni yuborishgan. Ularda kompyuterga kirish uchun zararli kod saqlangan. Manbalarning ta'kidlashicha, qurilmalarni buzib kirishga urinishlar samarasiz bo‘lgan.    

Avvalroq Rossiyaning Gamaleya nomidagi markazi o‘zi ishlab chiqqan “Sputnik V” vaksinasini AstraZeneca vaksinasi bilan kombinatsiyalashni taklif qilgan. Vaksinalarning samaradorligi mos ravishda 95 va 70 foizni tashkil qiladi. Rossiyalik mutaxassislar vaksinalarning birlashtirilishi AstraZeneca vaksinasi samaradorligini oshiradi deb hisoblashmoqda.

Ayni vaqtda dunyoda koronavirusga qarshi 200dan ko‘proq vaksina ishlab chiqilmoqda. Ulardan bir nechtasigina sinovlarning yakuniy bosqichiga yetib kelgan. BioNTech va Pfizer, Moderna, AstraZeneca va Gamaleya nomidagi markaz o‘z vaksinalarining samaradorligi yuqoriligini ma'lum qilishgan.

Mavzu
Koronavirus
2019 yilning dekabr oyi oxirida Xitoyning Uxan shahrida noma'lum virus tarqala boshladi. Bu virus havo orqali odamdan odamga yuqadi va o‘limga olib keladi.
Barchasi
Top