22:08 / 21.01.2021
29110
Qarshida voyaga yetmagan bolalarini muttasil qiynab kelgan ota qamoqqa olindi

Qarshi shahrida voyaga yetmagan ikki o‘g‘liga o‘ldirish bilan tahdid qilgan ota ustidan jinoyat ishi qo‘zg‘atildi. Bolalar ijtimoiy himoyaga olingan.

Qashqadaryo prokurori Erkaboy Tojiyev / Foto: Viloyat prokuraturasi

Kun.uz holat yuzasidan bugun, 21 yanvar kuni xabar bergan edi. Unda Qarshi shahrining Kamandi mahallasida ota voyaga yetmagan ikki farzandini haqoratlab, o‘ldirish bilan qo‘rqitayotgani ma'lum qilingandi.

Qashqadaryo viloyati prokuraturasi xabariga ko‘ra, viloyat prokurori Erkaboy Tojiboyev mutasaddi tashkilotlar vakillari ishtirokida voyaga yetmagan ikki bolani buvisi bilan birga viloyat prokuraturasiga taklif qilib, suhbatlashgan.

Foto: Qashqadaryo viloyati prokuraturasi

Aniqlanishicha, bolalar otasi tomonidan muttasil qiynab, urib, haqoratlab kelingan.

Holat yuzasidan shu kunning o‘zida JKning 110-moddasi 2-qismi “a” bandi (voyaga yetmagan shaxsni muttasil qiynash) bilan jinoyat ishi qo‘zg‘atilib, ota A.R. qamoqqa olindi.

«Voyaga yetmagan shaxslar ijtimoiy himoyaga olinib, tergov harakatlari yuzasidan nazorat o‘rnatildi», – deyiladi xabarda.

A.R. endilikda 360–480 soat majburiy jamoat ishlari, 2–3 yil axloq tuzatish ishlari, 2–4 yil ozodlikni cheklash yoki 5 yilgacha ozodlikdan mahrum qilish bilan jazolanishi mumkin.

Top