18:04 / 13.02.2021
24674
Oliy ta'lim vazirligi Malibu-2 sotib olmoqda

Davlat organlaridagi xizmat avtomobillariga oid qaror loyihasi e'lon qilinganiga yarim yil bo‘ldi.

Oliy va o‘rta maxsus ta'lim vazirligi qariyb 326 mln so‘mga Malibu-2 avtomobilini xarid qilishga shartnoma tuzdi. Tegishli axborot davlat xaridlari portaliga joylandi.

Kun.uz muxbiri vazirlikda qimmatbaho avtomobilga qanchalik zarurat bo‘lgani bilan qiziqib, vazir o‘rinbosari Sarvar Buzrukxonov bilan bog‘landi.

Buzrukxonovga ko‘ra, shartnomada ko‘rsatilgan xizmat avtomobili vazir o‘rinbosarlaridan biri uchun amaldagi xizmat avtomobili texnik jihatdan eskirgani sababli xarid qilinmoqda.

«Shu haqdagi xabar Davlat xaridlari portalida joylashtirilganidan keyin turli izohlar yozilganini ko‘rdim. Avvalo shuni aytish kerakki, xizmat avtomobili vazir uchun emas, vazir o‘rinbosarlaridan biri uchun xarid qilinmoqda. Abduqodir Toshqulov hukumat bergan va barcha vazirlar foydalanadigan xizmat mashinasidan foydalanishda davom etyapti.

Xo‘sh, nega xizmat avtomobili xarid qilyapmiz? Buning sababi, vazir o‘rinbosarlaridan biri 2014 yildan buyon «Lacetti-Gentra» rusumli avtomobildan foydalanib keladi.

Bu yillar davomida ushbu transport vositasining texnik holati eskirgan. Shu tufayli u ko‘p xarajatni talab qilyapti. Biz mana shu xarajatlarni kamaytirish uchun ham uni almashtiryapmiz», – dedi Sarvar Buzrukxonov.

Uning qo‘shimcha qilishicha, Malibu-2 avtomobili avvaldan qilingan reja asosida, budjetdan tashqari mablag‘lar hisobidan xarid qilinmoqda.

Eslatib o‘tamiz, dekabr oyida Qoraqalpog‘iston Sog‘liqni saqlash vazirligining yangi rahbari ishni Malibu-2 xaridi bilan boshlagandi.

Umuman, 2020 yil davomida garchi pandemiya va u bilan bog‘liq iqtisodiy inqiroz ro‘y bergan bo‘lsa-da, O‘zbekistondagi ko‘plab markaziy va mahalliy davlat organlari qimmatbaho avtomobillar xarid qilgani jamoatchilik e'tirozlariga sabab bo‘ldi.

Bundan 6 oy oldin, o‘tgan yilning 12 avgustida «Davlat hokimiyati va boshqaruvi organlarida xizmat avtotransportlaridan foydalanish tizimini tubdan takomillashtirish chora-tadbirlari to‘g‘risida»gi prezident qarori loyihasi muhokamaga qo‘yilgandi.

Top