09:35 / 17.03.2021
5745
AQShda massaj salonlariga uyushtirilgan hujum oqibatida 8 kishi halok bo‘ldi
Foto: Sputnik

16 mart kuni AQShning Atlanta shahri va uning yaqinidagi okrugda massaj salonlariga hujum qilinishi oqibatida kamida 8 kishi halok bo‘ldi. Ushbu jinoyatni sodir etishda gumon qilinib 21 yoshli Robert Aaron Long qo‘lga olindi, deb xabar bergan KIRO telekanali.  

Avvalroq AJC portali hujumlar oqibatida 7 kishi halok bo‘lgani, 2 kishi yaralanganini ma'lum qilgan. Uning ma'lumotlariga ko‘ra, birinchi hujum Cheroki okrugidagi massaj salonida sodir etilgan. Bu yerda noma'lum shaxs o‘t ochib, voqea joyidan yashiringan. Hujum oqibatida 3 kishi halok bo‘lgan, 2 kishi yaralangan. Bir soat o‘tar-o‘tmas Atlanta shimolidagi yonma-yon joylashgan ikkita massaj saloniga ham xuddi shunday hujum uyushtirilgan. Bu hujumlar oqibatida 4 kishi halok bo‘lgan. Politsiya bir nechta yo‘llarni to‘sib qo‘ygan. 

Politsiya Atlantadagi va undan 50 km uzoqlikda joylashgan Cherokidagi hujumlar o‘rtasida bog‘liqlik bor-yo‘qligini hali aniqlamagan.  

Cherokidagi hujumda gumon qilinib 21 yoshli Robert Aaron Long qo‘lga olingan. U politsiya ta'qibidan keyin voqea joyidan mashinada bir necha soatlik uzoqlikda joylashgan Krisp okrugida ushlangan. 

Ta'kidlanishicha, hujumga uchragan massaj salonlarida asosan osiyoliklar ishlagan. 

Top