14:35 / 19.03.2021
14720
Dam olish kunlari yomg‘irli ob-havo bo‘lishi kutilmoqda

Bugun O‘zbekiston hududiga Kaspiy dengizi orqali Kavkaz hududlari ustida shakllangan nam va deyarli salqin havo massalari kirib kelishi boshlandi. Shimoliy hududlarda biroz yomg‘ir yog‘di, Buxoro, Navoiy viloyatlarida kun davomida biroz yomg‘ir yog‘ishi mumkin.

«O‘zgidromet» xabariga ko‘ra, respublikaning qolgan hududlarida kun davomida quruq va juda iliq ob-havo bo‘lishi kutilmoqda. Kunning o‘rtasiga kelib, havo 20-25 daraja issiqqacha ko‘tariladi. Faqat kechga tomon atmosfera fronti yaqinlashishida ba'zi joylarda yomg‘ir boshlanadi, momaqaldiroq bo‘lishi mumkin. Respublikada shamolning 17-22 m/s gacha, ayrim joylarda esa 23-28 m/s gacha kuchayishi kutilmoqda.

20 mart kuni havo massalari kirib kelishi O‘zbekistonning barcha hududlariga tarqaladi. Aksariyat tumanlarda vaqti-vaqti bilan yomg‘ir yog‘adi, ba'zi joylarda kuchli bo‘ladi. Faqat Qoraqalpog‘istonda, Xorazm viloyatida va Farg‘ona vodiysida yog‘ingarchilik kutilmaydi. Harorat 10-15 daraja iliqqacha pasayadi. Ba'zi joylarda shamol 17-22 m/s gacha kuchayadi.

Bayram kuni, 21 martda Farg‘ona vodiysi viloyatlarida momaqaldiroq bilan yomg‘ir yog‘adi. Respublikaning qolgan hududlarida yog‘ingarchiliksiz ob-havo bo‘lishi kutilmoqda, faqat Qoraqalpog‘istonda, Xorazm viloyatida ba'zi joylarda biroz yomg‘ir yog‘ishi mumkin, Toshkent viloyatida esa yomg‘ir faqat kechasi va ertalab yog‘ishi mumkin.

22 martda respublikaning barcha hududlarida (shimoliy hududlardan tashqari) havo iliq va quruq bo‘ladi. Havo harorati 21-22 martda 15-20 daraja iliqqacha ko‘tariladi.

Top