23:23 / 26.03.2021
16368
Suvaysh kanalini to‘sib qo‘ygan kemani suvga qaytarishga urinish muvaffaqiyatsiz yakunlandi

Hozirda asosiy e'tibor kemaning chap borti tarafdagi qum va loylarni olib tashlash orqali kanal tubini chuqurlashtirishga qaratilmoqda.

Foto: EPA/Vostock-photo

 Suvaysh kanalini to‘sib qo‘ygan Ever Given konteyner tashuvchi kemasini suvga qaytarishga urinish muvaffaqiyatsiz yakunlandi. Bu haqda kema operatori Berhard Shult Shipmanagment (BSS) ma'lum qildi.

«Bugun, 26 mart kuni kemani suvga qaytadan tushirishga urinish muvaffaqiyatsiz yakunlandi», — deyiladi xabarda.

Hozirda asosiy e'tibor kemaning chap borti tarafdagi qum va loylarni olib tashlash orqali kanal tubini chuqurlashtirishga qaratilmoqda.

Bu ishlarda yordam berayotgan Niderlandiyaning SMIT kompaniyasi 28 mart kuni qo‘shimcha yana ikkita shatak kemasi jalb qilinishini bildirdi.

Ulkan kema 23 mart kuni kanalda ko‘ndalang turib qolib, kemalar qatnovini to‘liq to‘xtatib qo‘ygandi. Dastlab kemani yo‘ldan olish bo‘yicha ishlar 2-3 kun davom etishi taxmin qilingandi.

Ammo kemani suvga qaytarish bilan shug‘ullanayotgan Boskalis kompaniyasi bunga haftalar ketishi mumkinligini ma'lum qildi.

Avvalroq Ever Given kemasining Suvaysh kanali orqali harakatlanishni to‘xtatib qo‘yishi jahon savdosiga soatiga 400 mln dollarga tushayotganligi aytilgandi.

Mavzu
Suvayshda tirbandlik
Ulkan kema Suvaysh kanaliga tiqilib qoldi, buning ortidan dunyoda neft narxi keskin o‘sdi.
Barchasi
Top