19:52 / 30.03.2021
3885
Qozog‘istonda maktab o‘quvchilari orasida koronavirus yuqtirish holatlari ko‘paygani ma'lum qilindi

1 yanvardan buyon 18 yoshgacha bo‘lgan 12862 nafar bolada koronavirus aniqlangan.

Foto: tengrinews.kz

Qozog‘istonda maktab o‘quvchilari orasida koronavirus yuqtirish holatlari mart oyida 5 foizga o‘sdi. Bu haqda mamlakat sog‘liqni saqlash vazirligi sanitar-epidemiologik nazorat qo‘mitasi raisi Ayjan Yesmagambetova ma'lum qildi.

Uning so‘zlariga ko‘ra, 1 yanvardan buyon 18 yoshgacha bo‘lgan 12862 nafar bolada koronavirus aniqlangan.

 «Mart oyida kasallanish holatlari 5 foizga oshganini ko‘rmoqdamiz. Maktab o‘quvchilari orasida kasallanishlar soni o‘sgani qayd etildi», — dedi Yesmagambetova.

Uning so‘zlariga ko‘ra, bolalar orasida kasallik tarqalishi o‘sishi virusning xorijiy shtammlari bilan bog‘liq.

«E'tiboringizni tadqiqot natijalariga qaratishni istardim, afsuski, britancha shtamm yoshlarga nisbatan ancha tajovuzkor. Ya'ni yoshlar oddiy koronavirusdan ko‘ra bu turdagi koronavirusni ko‘proq yuqtirmoqda», — deb qo‘shimcha qildi Yesmagambetova.

Avvalroq Qozog‘iston poytaxti Nur-Sultonda koronavirus bilan kasallanish holatlari ko‘payayotgani sababli 30 martdan yangi cheklovlar kiritilishi xabar qilingandi.

Mavzu
Koronavirus
2019 yilning dekabr oyi oxirida Xitoyning Uxan shahrida noma'lum virus tarqala boshladi. Bu virus havo orqali odamdan odamga yuqadi va o‘limga olib keladi.
Barchasi
Top