21:15 / 23.04.2021
4644
Belarusga Skoda auto, Liqui Moly va Beiersdorf mahsulotlarini olib kirish taqiqlandi

Ta'kidlanishicha, ushbu qaror «Belarus xalqiga nisbatan nodo‘stona harakatlar hisobga olingan holda milliy manfaatlarni himoya qilish maqsadida» qabul qilingan.

Foto: Yuriko Nakao/Getty Images

Belarus hukumati sanksiya choralarini joriy etdi va mamlakat hududiga Skoda auto, Liqui Moly va Beiersdorf savdo markalari mahsulotlari olib kirilishini taqiqladi.

Olib kirish taqiqlangan mahsulotlar ro‘yxatiga Liqui Moly, Skoda auto va Beiersdorf (Nivea, Eucerin, La Prairie, Labello, Hansaplast, Florena, «8X4», Skin Stories, Gammon, Tesa, Chaul, Coppertone, Hidrofugal, Stop The Water While Using Me! savdo markalari) guruhlari mahsulotlari kiritildi, deyiladi mamlakat hukumati matbuot xizmati xabarida.

Ta'kidlanishicha, ushbu qaror «Belarus xalqiga nisbatan nodo‘stona harakatlar hisobga olingan holda milliy manfaatlarni himoya qilish maqsadida» qabul qilingan.

Taqiq hujjat e'lon qilinganidan 10 kun o‘tib kuchga kiradi va 6 oy davomida amal qiladi.

Hujjatga ko‘ra, Belarus hududiga taqiqlangan mahsulotlar olib kirilgani aniqlangan holatda bu mahsulotlar ortga qaytarib yuboriladi.

Taqiq shaxsiy foydalanish uchun olib kirilgan mahsulotlar hamda YeOIIga a'zo davlatlarda ro‘yxatga olingan yoki YeOII hududiga vaqtincha kirib kelgan transport vositalariga nisbatan qo‘llanilmaydi.

Top